Botanica

De Vicipedia
La Jardin Linnean en Uppsala, Sveria
Un botaniciste preparante un planta per planta en la erberia

Botanica, ance nomida la biolojia de plantas, es la siensa de plantas e un ramo de biolojia. Un botaniciste es un siensiste ci spesiali en esta ramo. La parola "botanica" deriva de la parola elinica βοτάνη (botane) cual sinifia "pasto", "erba", o "comeda per bestias". Tradisional, botanica ia inclui ance la studia de fungos e alges par micolojistes e ficolojistes, en acel ordina, e la studia de esta grupos de organismes resta en la sfero de interese de la Congresa Internasional Botanical. Oji, botanistes, en la sinifia restrinjeda, studia sirca 410,000 spesies de plantas teran, de cual alga 391,000 spesies es plantas vasculal (incluinte sirca 369,000 spesies de plantas florinte) e sirca 20,000 es briofites.

Botanica ia orijina en preistoria como erbalisme, con la atentas de umanas temprana per identifia - e plu tarde cultiva - plantas comable, medical, e venenosa, cual sujeste ce botanica es un de la ramos de siensa la plu vea. Jardines medieval "fisical" (pd medical), comun afisada a moncerias, ia conteni plantas de importa medical. Los ia es la asendentes de la jardines botanical afisada a universias pos 1540. Un de la plu temprana ia es la jardin botanica de Padua. Esta jardines ia fasili la studia siensal de plantas. Atentas per catalogi e descrive sua colies ia es la comensa de la tasonomia de plantas, e ia resulta en 1753 con la sistem binomal de Carl Linnaeus cual resta usada a oji.

En la sentenios 19 e 20, tecnicas nova ia es developada per la studia de plantas, incluinte metodos de microscopia otical, imaji de selulas vivente, microscopio eletronal, la analise de cuantia de cromosomas, la cimica de plantas, e la strutur e funsiona de enzimas e otra protenas. En la du desenios final de la sentenio 20, botanicistes ia esplota la tecnicas de analise de jenetica moleculal, incluinte la jenomica, proteomica, e seguentia de ADN per clasi plantas plu esata.