Azerbaidjani (lingua)

De Vicipedia
Jump to navigation Jump to search

Azerbaidjani refere a du dialetos (caucasian e irani) cual es parlada xef par la popla azerbaijani, ci abita en Azerbaijan e Iran. Los ave diferes sinifiante en fonolojia, vocabulo, morfolojia, sintatica, e parolas emprestada. Linguistes vide los como alga cosa entre un dialeto e un lingua, e la du como membros de un "macrolingua".

Azerbaidjani ave un state ofisial en Azerbaidjan e Dagestan (en Rusia), ma no en Iran do la majoria de azerbaidjanis abita. La lingua es ance parlada a grados variosa en comunias azerbaidjani en Sacartvelo e Turcia, e par comunias de diaspora en Europa e America Norde.

La du azerbaidjanis es membros de la ramo oguz de la familia de linguas turcica. Lo es relatada prosima a turces, caxcai, gagauz, turcmen, e tatar crimean. Parlores de azerbaidjani e turces pote comunica con lunlotra con alga fasilia.

Ante 1929, azerbaidjani ia es scriveda sola en la varia persian de la alfabeta arabi. Entre 1929 e 1938, la popla de Azerbaidjan ia usa la alfabeta latina. De 1938 a 1991, cuando la area ia es dominada par Rusia, la alfabeta cirilica ia es usada. En 1991, un forma nova de la alfabeta latina ia es introduida, ma la cambia ia progresa lente. En Iran, azerbaidjani es ancora scriveda en la alfabeta arabi, e en Dagestan (Rusia), en la alfabeta cirilica.