Astrofisica

De Vicipedia
Jump to navigation Jump to search

Astrofisica es un ramo de astronomia cual usa la prinsipes de fisica e cimica "per serti la natur de ojetos astronomial, en loca de sua locas o moves en spasio". Entre la ojetos studiada es la Sol, otras stelas, galasias, planetas estrasolal, la media interstelal e la radia fondal de microondas. Emites de esta ojetos es esaminada tra tota la partes de la spetro eletromagnetal, e la proprias esaminada inclui luminia, densia, temperatura, e composa cimical. Car astrofisica es un sujeto multe larga, astrofisicistes aplica consetas e metodos de multe disiplinas de fisica, incluinte mecanica clasica, eletromagnetia, mecanica statistical, termodinamica, mecanica cuantal, relativia, fisica nucleal e de particulas e fisica moleculal e atomal.

En pratica, rexerca astronomial moderna implica frecuente un cuantia importante de labora en la renas de fisica teorial e oserval. Alga areas de studia de astrofisicistes inclui sua atentas per determina la proprias de materia oscur, enerjia oscur, bucos negra, e otra corpos sielal; si viaja en la tempo es posible, si bucos de verme pote es formida, o si la multiverso esiste; dinamica stelal e evolui; formi e evolui de galasia; orijina de la raios universal; relativia, cosmolojia cuantal e fisical.