Anemia de selulas falxetin

De Vicipedia
Jump to navigation Jump to search
Selulas normal de sangue, con un selula falxetin

La maladia de anemia de selulas falxetin es un maladia de la sangue tipal eritada de la jenitores de un person. Lo resulta en un situa nonormal en la protena emoglobin cual porta osijen tra la sistem sangual, trovada en la selulas sangual roja. Esta resulta en un forma rijida falxetin en alga situas spesifada. Problemes en la maladia comensa tipal en enfantes ci ave sirca since o ses anios. Alga problemes de sania pote developa, como atacas de dole ("crise de selulas falxetin"), anemia, infla de la manos e pedes, infetas baterial, e atacas serebral. Dole durante pote developa en cuando un person deveni plu vea. E la longia de vive espetada en la mundo developada es sirca 40 a 60 anios.

Anemia de selulas falxetin aveni cuando un person erita du copias nonormal de la jen per emoglobin, un jen de cada jenitor. Esta jen aveni en cromosoma 11. Alga sutipos esiste, dependente sur la muta esata en cada jen de emoglobin. Un ataca pote es causada par cambias de temperatur, stresa, desidrata, e altia grande. Un person con sola un copia nonormal no tipal ave sintomes e es considerada como algun ci es un portor de la maladia. Diagnose es par un esamina de la sangue, e en alga paises, tota bebetas per la maladia. Diagnose es an posible entra ensintia.

La cura de persones con anemia de selulas falxetin pote inclui preveni de infeta con vasines e antimicrobiales, crese de enflue de fluidas, la aumenta de asida folica, e medisin per dole. Otra tratas pote inclui transfusa de sangue e la medisin idroxicarbamida. Un persento peti de persones pote es sanida par un transplanta de selulas de medula de oso.

A 2015, sirca 4.4 milion persones ia ave la maladia, e un otra 43 milion es portores. Sirca 80% de casos de la maladia es pensada como aveni en Africa susaharan. Lo aveni ance alga frecuente en partes de India, la penisola de Arabia, e entre popla ci desende de africanes cual vive en otra partes de la mundo. En 2015, lo ia resulta en sirca 114,800 moris. La maladia ia es prima descriveda en la leteratur medical par un dotor medical american James B. Herrick en 1910. En 1949, la transmete jenetical ia es descovreda par E. A. Beet e J. V. Neel. E en 1954, la efeto protejente contra malaria en portores de la jen ia es descriveda.