Zaandam

Zaandam es un site en la provinse Holland Norde, Nederland. Lo es la site xef de la munisipa de Zaanstad, e ia reseta diretos de site en 1811. Lo es locada a la Rio Zaan, norde de Amsterdam. La distrito statistical Zaandam, cual covre la site e la campania ensircante, ave un cuantia de popla de sirca 76,804.

La rejion sirca la Rio Zaan (pd, la Zaanstreek) es liada forte con industria. En la Eda de Oro Nederlandes, Zaandam ia es un sentro de molini grande. Miles de sieras propulsada par molenes cual ia prosede lenio de Scandinavia per la industrias de fabrica de barcones e de paper. Un sculta cual onora esta industria ia es comisionida de la scultor Slavomir Miletić, e la sculta, "De houtwerker" (la lenior) ia es instalada a 20 junio 2004.

Zaandam ia es un site inisiante en la Revolui Industrial prima. En la dui du de la sentenio 20, Zaandam ia es ancora un porton importante per lenio. Lo es ance liada istorial con la industria de xasa de balenas.

En 1697, Tsar Piotr la grande de Rusia ia spende alga tempo en Zaandam, do el ia studia la construi de barcones. El ia resta en un casa peti de lenio, construida en 1632, ma ia es forsada per parte car el ia atrae tro multe atende de la popla local; el ia move a Amsterdam, do el ia studia a un de la molos de la Compania Nederlandes de India Este. La casa de lenio en cual el ia abita ia es conservada e cambiada a un museo, la Casa de Tsar Piotr. Un sculta cual onora el ia es poneda a la Cuadro de la Parario en 1911, e ia es declarada un Rijksmonument (monumento de la rena).

En 1871, la depintor impresiste Claude Monet ia abita en Zaandam per sirca un dui de la anio. En acel periodo, el ia crea 25 depintas de la area, incluinte "Casas sur la Acherzaan", "Barcones en Holland prosima a Zaadam", e "Un Molen a Zaandam".