Revolui Industrial

De Vicipedia
Salta a: naviga, xerca
Un macina de vapor de tipo Watt, construida par D. Napier and Son (London) en 1859. Lo es un de la macinas de vapor un instalada en Espania.

La Revolui Industrial ia es la cambia a un prosede nova de fabrica en la periodo entre s 1760 a 1820-1840. Esta cambia ia inclui vade de metodos de produi par mano a macinas, prosedes nova de produi de fero, la usa cresente de la potia de vapor, la developa de macinas-utiles e la asende de la sistem de fabricerias.

La stofa ia es la industria dominante de la revolui industrial en relata con emplea, valua de esflue e capital investida. La industria de stofa ia es ance la prima en usa metodos de produi moderna.

La revolui industrial ia comensa en BRitan, e multe de la inovas ia es brites. En la dui de la sentenio 18, Britan ia controla un impero comersial global con colonias en America Norde e Africa, e con alga influe political en la sucontinente Indian, tra la ativias de la Compania Brites de India Este. La developa de comersia e la asende de comersia ia es la causas xef de la revolui industrial.

La revolui industrial ia es un punto de cambia major en la istoria, casi tota aspeta de vive dial ia es influeda en alga forma. Spesial, la revenu promedia ie la popla ia comensa a esibi crese sustable sin presedente. Alga economistes dise ce la efeto major de la revolui industrial ia es ce la model de vive per la popla jeneral ia comensa a crese coerente per ves un en istoria, an si otra ia dise ce lo ia no comensa de boni de forma sinifiosa asta la sentenio 19 tarda e la sentenio 20 temprana.

La produi interna bruta per person ia es larga stable ante la revolui industrial e la emerji de la economia capitaliste moderna, contra ce la revolui industrial ia comensa un era de crese economial per person en economias capitaliste. La istoristes economial acorda ce la comensa de la revolui industrial es la aveni la plu importante en la istoria de umania de la doma de animales e plantas.

La comensa e fini esata de la revolui industrial es ancora discuteda par la istoristes, car lo es un move de cambias economial e sosial. Eric Hobsbawm ia dise ce la revolui industrial ia comensa en Rena Unida en la desenio de 1780 e ia no es sentida intera asta la desenio de 1830 0 1840, contra ce T. S. Ashton ia dise ce lo ia aveni entre 1760 e 1830. Industri rapida ia aveni un en Britan, con proportios alta de crese en macinas de vapor e produi de fero aveninte pos 1800. La produi de stofa macinida ia estende de Rena Unida a Europa continental e a Statos Unida en la sentenio 19 temprana, con sentros importante de stofa, fero e carbon emerjinte en Beljia e Statos Unida e a pos stofa en Frans.

Un retrosede economial ia aveni de la desenio 1830 tarda a la desenio 1840 temprana cuando la adota de la inovas orijinal de la revolui industrial, como fili e texe macinida, ia lenti e sua mercatos ia maturi. Otra inovas ia develop plu tarde en la periodo, como la adota cresente de locomotivas e barcones de vapor, fonde de aser par soflon calda e tecnolojias nova, como la telegraf eletrica, introduida jeneral en desenios 1840 e 1859, ia no es bastante potiosa per condui proportios plu grande de crese. Crese economial rapida ia comensa a pos 1870, orijinante de un grupo nova de inovas en lo ce ia es nomida la revolui industrial du. Esta inovas nova ia inclui prosedes nova per fa aser, la fabrica vasta de macinas util e la usa de macinas cresente plu avansada en la fabricerias propulsada par vapor.