Viktor Frankl

De Vicipedia
Jump to navigation Jump to search
Viktor Frankl en 1964

Viktor Frankl ia es naseda en Wien a 26 marto 1905. Sua padre, Gabriel Frankl, ia es un om forte e autodisiplinada de Moravia ci ia labora sua via de un stenografiste per la governa a la dirijor de la ministreria de servi sosial. Sua madre, Elsa Frankl (naseda Lion), ia es un fem plu compatiosa e relijiosa de Praha.

La enfante media de tre, Viktor ia es temprana matur e multe curiosa. An a la eda de cuatro, el ia sabe ja ce el vole es un dotor medical.

En scola alta, Viktor ia es ativa envolveda en la organiza local de la Laborores Sosialiste Joven. Sua interesa en personalia ia move el a la studia de psicolojia. El ia fini sua anios en scola alta con un esaia psicoanalitica sur la filosofiste Arthur Schopenhauer, un publica en la Jornal Internasional de Psicoanalise, e la comensa de un coresponde alga intensa con Sigmund Freud.

En 1925, un anio pos gradua, el ia encontra Freud. Ma Frankl ia gusta plu la teoria de Alfred Adler, e el ia publica un article - "Psicoterapia e Weltanschauun" en la Jornal Internasional de Psicolojia Individual. La anio seguente, Frankl ia usa la terma logoterapia en un leson a la publica per la ves prima, e ia comensa developa sua varia de psicolojia de Wien.

En 1928 e 1929, Frankl ia developa sentros de consela per adolesentes sin costa en Wien e ses otra sites, e ia comensa labora a la Clinica de la Universia de Psiciatria. En 1930, el ia ateni sua diploma dotoral en medica, e ia es levada a la posto de aidante. En la anios seguente, Frankl ia continua sua educa en neurolojia.

En 1933, el ia es encargada con un sala per femes suisidal a la Ospital Psiciatrial, con multe miles de pasientes a cada anio. En 1937, Frankl ia abri sua propre ofisia en neurolojia e psiciatria. Un anio plu tarde, la armada de Hitler ia invade Osteraic. El ia oteni un visa a la SUA en 1939 ma, consernada per sua jenitores vea, el ia lasa ce lo desvalidi.

En 1940, Frankl ia es encargada como la xef de la departe neurolojia de la Ospital Rothschild, la sola ospital per iudis en Wien en la rena par la nazis. El ia fa multe diagnose falsa de sua pasientes per evita la politicas nova cual comanda ce persones con maladias mental debe es eutanasiada. En esta period, el ia comensa sua manoscrito Ärzliche Seelsorge ("cura medical de la spirito").

Frankl ia sposi en 1942 con Tilly Grosser, ma en setembre de acel anio, el, sua sposa, sua padre, madre, e frate, ia es arestada e traeda a la geto a Theresienstadt en Boemia. Sua padre ia mori de famia. Sua madre e frate ia es matada a Auschwitz en 1944. E sua sposa ia mori a Bergen-Belsen en 1945. Sola sua sore ia survive, car el ia migra a Australia un tempo corta plu temprana.

Cuando el ia es moveda a Auschwitz, sua manoscrito ia es descovreda e destruida. Sua desira per completa sua obra, e sua esperas ce el ta es reunida con sua sposa e familia, ia manteni el en un situa cual es a otra veses sin espera.

Pos du plu moves a du plu campos, Frankl ia sede final a febre tifoide. El ia pote resta veliada par reconstrui sua manoscrito sur pesetas de paper furida. En april de 1945, la campo en cual Frankl ia abita ia es librida, e el ia reveni a Wien, sola per descovre de sua familia ia mori. An ce el ia es cuasi rompeda e vera solitar en la mundo, el ia es donada la posto de dirijor de la Policlinica Neurolojial de Wien, un posto cual el ia teni per 25 anios.

Ultima, el ia reconstrui sua libro e publici lo, cual gania per el un posto como instruor a la Scola Medical de la Universia de Wien. En sola nova dias, e ia dita un otra libro, cual ta deveni La xerca per sinifia par umanes.

En esta periodo, el ia encontra un aidor joven de la sala de sirurjia nomida Eleonore Schwindt - "Elly" - e el cade en ama a la vide prima. An si dui sua eda, el ia atribui a el con dona la coraje per reestabli se en la mundo. Los sposi en 1947, e ia ave un fia, Gabriele, en desembre de acel anio.

En 1948, Frankl ia reseta sua diploma dotoral en filosofia. Sua tese - La dio nonconsensa - ia es un esamina de la relata de psicolojia a relijio. En la mesma anio, el ia deveni profesor asosiada de neurolojia e psiciatria a la Universia de Wien. En 1950, el fundi e deveni presidente de la Sosia Medical Osteraices per Psicoterapia.

Pos es levada a profesor plen, el ia deveni plu conoseda en sirculos esta Wien. Sua onoras es tro multe per lista asi, ma ia inclui la Premio de Oskar Pfister par la Sosia American de Psiciatria, e ia reseta un nomina per la Premio de Pas de Nobel.

Frankl ia continua instrui a la Universia de Wien asta 1990, cuando el ia es 85. On debe nota ce el ia es un trepor de montes e gania sua lisensa de pilote de aviones cuando el ia es 67.

En 1992, amis e membros familial ia crea la Institui de Viktor Frankl en sua onora. En 1995, el ia completa sua autobiografia, e en 1997, el ia publica sua obra final, La xerca per sinifia ultima par umanas, fundida sur sua tese dotoral. El ia scrive 32 libros, e los ia es traduida a 27 linguas.

Viktor Frankl ia mori a 2 setembre 1997, de fali de cor. El es surviveda par sua sposa Eleonore, sua fia dotor Gabriele Frankl-Vesely, sua netes Katharina e Alexander, e sua duneta Anna Viktoria. Sua afeta sur psicolojia e psiciatria va es notada per sentenios futur.