Alfred Adler
Alfred Adler ia nase en la suburbes de Wien en Osteraic a 7 febrero 1870, la enfante tre, la fio du, de un mercator iudi de gran e sua sposa. Cuando un enfante, Alfred ia developa racite, cual ia preveni el de pasea asta cuando el ia ave cuatro anios. A sinco anios, el ia mori cuasi de pneumonia. A esta eda, el ia deside deveni un dotor medical.
Alfred ia es un studiante promedia, e ia prefere jua a estra plu ca es prisonida en scola. El ia es estrovertida, popular e ativa, e ia es reconoseda per sua atentas a suprapasa sua frate plu vea, Sigmund.
El ia reseta sua diploma medical de la Universia de Wien en 1895. En sua anios a universia, el ia deveni juntada a un grupo de studiantes sosialiste, entre ci el ia trova sua sposa futur, Raissa Timofeyewna Epstein. Raissa ia es un inteletosa e un ativiste sosial ci ia veni de Rusia per studia en Wien. Los ia sposi en 1897 e ia ave ultima cuatro enfantes, de ci du ia deveni psiciatristes.
El ia comensa sua carera medical como un oftalmolojiste, ma ia cambia pronto a un pratica jeneral, e ia fundi sua ofisia en la parte de Wien de la clase basa, fasante la Prater, un combina de un parce divertinte e un sirco. Sua clientes ia inclui persones de la sirco, e alga ia sujesta (Furtmuller, 1965) ce la fortias e debilias noncomun de la presentores ia condui el a sua comprendes de la compensa de la inferiorias organal.
Plu tarda, Adler ia dirije se a psiciatria, e en 1907 el ia es invitada per junta se a la grupo de discute de Sigmund Freud. Pos la scrive de articles sur la inferioria organal, cual ia acorda bon con la ideas de Freud, el ia scrive un article sur la instinto de ataca, cual Freud no ia aproba, e alora un article sur la senti de inferioria en enfantes, cual ia sujesta ce la instinto sesal debe es plu metaforal ca leteral.
An si Freud ia nomi Adler la presidente de la Asosia Analisal de Wien e la coeditor de la jornal de novas de la organiza, Adler no ia para sua criticas. Un debate entre la suportores de Adler e los de Freud ia es organizada, ma la resulta ia es ce Adler e nove otra membros de la organiza ia resinia per fundi la Asosia per Psicoanalise Libre en 1911. Esta organiza ia deveni la Asosia per Psicolojia Individua en la anio seguente.
En la Gera Mundal 1, Adler ia es un mediciste en la armada de Osteraic, prima a la frontera Rusce, e plu tarda a un ospital per enfantes. El mesma ia vide la dana cual la gera fa, e sua pensas ia verje plu a la conseta de interesa sosial. El crede ce, si umanas ta supravive, los debe cambia sua modos!
Pos la gera, el ia es envolveda en projetas diversa, incluinte clinicas juntada a scolas de stato e la instrui de instruores. En 1926, el ia vade a la Statos Unida per presenta lesones, e ultima el ia aseta un posto a la Universia de Medica de Long Island. En 1934, el e sua familia ia parti de Wien per sempre. A 28 maio 1937, entre un serie de lesones a la Universia de Aberdeen, el ia mori de un ataca de cor.
Lias esterna[edita | edita la fonte]
- Wikimedia Commons – fotos de stradas e canales