Tito Livio
Tito Livio (latina clasica: Titus Livius, pronunsiada [ˈtɪ.tʊs ˈliː.wi.ʊs]; 64 o 59 aec - 12 o 17 ec) ia es un istoriste roman. El ia scrive un istoria de Roma e la popla roman – Ab Urbe condita libri (Libros sur la Fundi de la Site) – covrente la periodo de la lejendas prima de Roma (ante la fundi tradisional en 753 aec) asta de la rena de Augusto en la vive intera de Livio. El ia es conoseda par la dinastia julio-claudia, esente un conselor de la dusobrino de Augusto, la imperor futur Claudio, como un om joven no multe ante 14 ec en un letera en cual el ia comensa sua scrive de istoria. Livio e la sposa de Augusto, Livia, ia veni de la mesma clan en locas diferente, an si los ia no ia es relatada par sangue.
Vive
[edita | edita la fonte]Livio ia nase en Patavium, en Italia norde, oji Padua. On ave un disputa sur la anio en cual el ia nase: esce 64 aec o 59 aec. En la tempo de sua nase, sua site ia es la numero du de la plu ricas de la penisola Italian, e la plu grande en la provinse de Galia Sisalpan. En sua obras, Livio espresa frecuente sua ama profonda e orgulo per Patavium, e la site ia es conoseda par sua valuas conservaliste en moralia e politica. "El ia es par natur solitar, nonestrema en tempera e antipatiosa con la violentia; la pas restorada de sua tempo ia dona a el la oportun de usa sua pasion en la pasada istorial e lejendal de la pais cual el ia ama."
Sua adolese ia aveni en la anios 40 aec, un periodo de multe geras interna tra la mundo roman. La governor de Galia Sisalpin en acel tempo, Asinio Polio, ia atenta convinse Patavium per suporta Marco Antonio, gidor de un de la partitos en luta. La sitadanes rica de Patavium ia rejeta contribui con mone e armas a Asinio Polio, e los ia asconde. Alora Polio ia atenta soborna la sclavos e acel sitadanes rica per esposa la secretas de sua padrones, ma esta ia no funsiona e la sitadanes ia promete sua fida a la Senato. Lo es donce probable ce la geras interna ia impedi Livio de segue un educa de universia en Roma o vade en turi a Elas, cual ia es comun entre la adolesentes mas de la nobilia en acel tempo. A multe anios plu tarda, Asinio Polio ia comenta la "patavinia" de Livio, disente ce la latina de Livio ia mostra alga "provinsialismes" nonasetada en Roma. Esta comenta par Polio ta pote es resulta de la odia a la site de Patavium par causa de sua esperias en la geras interna.
Probable Tito Livio ia vade a Roma en la anio 30 aec e ia resta en la site per un larga tempo pos esta, an si cisa lo no ia es sua abita xef. En sua tempo en Roma, el ia ave nunca un ofisia en la governa. Sua scrivedas ave eras fundal sur cosas militar, indicante ce probable el ia servi nunca en la armada roman. An tal, el ia es educada en filosofia e retorica. Lo pare ce Livio ia ave fontes finansial per un vive autonom, an si la orijina de sua ricia es nonconoseda. El ia dedica un parte grande de sua vive a sua scrivedas, cual el ia pote fa par causa de sua libria economial. Livio ia sposi e ia ave un fia e un fio.
La obra la plu famosa de Livio es sua istoria de Roma. En lo, el nara un istoria completa de la site de Roma, de sua fundi asta la mori de Augusto. Car el ia scrive en la rena de Augusto, sua istoria asentua la vinses grande de Roma. El ia scrive sua istoria con reportas belida de la eroisme roman per promove la tipo nova de governa enforsada par Augusto cuando el ia deveni imperor. En la prefasa a sua istoria, el ia dise ce lo no importa si sua fama personal ia resta en oscuria, si sola sua obra ia aida "conserva la memoria de la atas de la nasion suprapasante en la mundo". Car Livio ia scrive xef sur avenis cual ia aveni a sentos de anios plu temprana, la valua istorial de sua obra es dutable, an si multe romanes ia crede sua nara como vera. El ia scrive ance otra obras, incluinte un esajo en forma de letera a sua fio, e dialogos diversa, probable fundida en obras simil de Ciceron.
Tito Livio ia mori en sua site de Patavium en 12 ec o en 17 ec; la data ultima ta es tre anios pos la mori de la imperor Augusto.
Obras
[edita | edita la fonte]La sola obra cual ia survive de Livio es la "Istoria de Roma" (Ab Urbe Condita), cual ia es sua carera de 32 anios, asta cuando el ia abandona Roma per vade a Padua en un eda vea, probable en la rena de Tiberio pos la mori de Augusto. Cuando el ia comensa sua labora, el no ia es joven; e avenis en sua vive ante acel tempo ia gida el a deveni istoriste. Seneca la Joven ia nota ce Livio ia es ance conoseda como retoriciste e filosofiste e ce el ia scrive alga tratas en acel campos de un punto de vide istorial.
Reseta
[edita | edita la fonte]La Istoria de Roma par Livio ia es multe popular de la tempo de sua publici e ia resta tal en la anios temprana de la impero. Plinio la Joven ia reporta ce la fama de Livio ia es tan vasta ce un om de Cadiz ia viaja a Roma sola per conose el. La obra de Livio ia es un fonte per obras plu tarda de Aurelio Victor, Casiodoro, Eutropio, Festo, Floro, Granio Liciniano e Orosio.
Bibliografia
[edita | edita la fonte]- Burck, E (1934), Die Erzählungskunst des T. Livius (Berlin).
- Chaplin, J (2000), Livy’s Exemplary History (Oxford).
- Feldherr, A (1998), Spectacle and Society in Livy’s History (Berkeley and London).
- Jaeger, M (1997), Livy’s Written Rome (Ann Arbor).
- Kraus, C S and Woodman, A J (1997), Latin Historians (Oxford).
- Luce, T J (1977), Livy: The Composition of his History (Princeton).
- Miles, G B (1997), Livy: Reconstructing Early Rome (Cornell).
- Oakley, S P (1997), A Commentary on Livy, Books VI-X (Oxford).
- Ogilvie, R M (1965), A Commentary on Livy Books 1 to 5 (Oxford).
- Walsh, P G (1961), Livy: His Historical Aims and Methods (Cambridge).