Teoria de larinjales

De Vicipedia
Jump to navigation Jump to search

La teoria de larinjales es un ipotese multe asetada en la linguistica istorial de la linguas indo-european, cual sujeste ce la lingua proto-indo-european (PIE) ia ave un serie de fonemes ultra los reconstruida con la metodo comparante. La varia la plu asetada de la teoria ance sujeste ce esta fonemes ia es consonantes "larinjal" de un loca nondeterminada de pronunsia a la dorso de la boca. La teoria es intendeda per produi plu coere en la reconstrui de la fonolojia de PIE ca la reconstrui par la metodo comparante. Notable, lo es intendeda per estende la aveni jeneral de la apofonia (ablaut) indo-european a silabas con vocales reconstruida esta *e o *o.

Orijinal, la teoria ia introdui du sona en PIE cual, combinada con *e o *o reconstruida ta produi vocales cual no ta es prediseda par la regulas normal de ablaut. Esta ia es suportada pos la desifri de hitita, cual mostra ce lo ia es un lingua indo-european. Multe parolas hitita ia es demostrada como deriva de PIE, con un fonem representada par ḫ. Regulas variosa ia es sujeste per como desendentes de parolas en linguas fial pote es derivada de radises en PIE.

En la varia la plu asetada, la teoria introdui tre fonemes larinjal en PIE, indicada par h1Subscript text, h2, e h3. Otra linguas fial ia erita la sonas derivada, cual ia resulta de sua fusa con vocales corta de PIE segueda par la perde de la consonantes ipotesal. La sonas ia es nomida larinjales car, en la teorias orijinal, los ia es pensada como aveni en o prosima la larinje, cual alora afeta la cualia de la vocal prosima. Sua natur resta un caso per debate.

La tre "larinjeales" la plu asetada es:

  • h₁, la larinjal "neutra", cual permete ce la vocal (tipal e) no cambia;
  • h₂, la larinjal "a-colorante", cual cambia la vocal a a;
  • h₃, la larinjal "o-colorante", cual cambia la vocal a o.

Plu, si la larinjal segue la vocal, la vocal deveni longa; si lo presede la vocal, la vocal resta corta.

Sujestes per la pronunsias de la "larinjales" inclui estas:

  • h₁: [ʔ] [h] [ç] [hj]
  • h₂: [ħ] [ʕ] [ʜ] [ʢ] [χ] [x] [h]
  • h₃: [ʕʷ] [ʢʷ] [ɣʷ][ xʷ] [ʍ] [hw]

Evidente direta per la esiste de esta larinjales veni de hitita: PIE *a es un fonem rara, e es comun la sona prima, per esemplo elinica anti, latina ante, sanscrito anti, etc. Ma en hitita, on ave un parola relatada ḫants, cual sujeste ce la parola orijinal en PIE ia es *h2ent-, e no la forma plu tradisional *anti, e la h2 ia causa ce la e deveni a e la h2 desapare en tota linguas fial, estra hitita.

Otra evidentes es trovada en elinica: entre du consonantes, la larinjales es tipal reduida en la linguas fial a un vocal; ma en elinica, on pote vide tre vocales diferente. La esplica es simple, e es mostrada par esta esemplos:

  • PIE *ish₁rós "santa" > elinica hierós
  • PIE *ph₂tḗr "padre" > elinica patḗr
  • PIE *dh₃tós "dado" > elinica dotos