Spada

De Vicipedia
Jump to navigation Jump to search
Spadas

Un spada es un arma con un lama, intendeda per talia o puxa, cual es plu longa ca un cotela o un daga. La defini esata varia con la eda istorial o la rejion jeografial. Un spada es composada de un lama longa juntada a un manico. La lama pote es reta o curvida. Spada puxante ave un puntas acu a la lamas, e tenda es plu reta; Spadas taliante ave un borda agida a un o ambos lados de la lama, e es plu probable curvida. Multe spadas es desiniada per ambos talia e puxa.

La spada ia developa en la eda de bronze, evoluinte de la daga; la esemplos la plu temprana es datada a sirca 1600 aec. En la eda de fero, la spada ia resta alga corta e sin un garda de mano. La spada, como lo ia developa en la armada roman tarde, deveni la presedente de la spada european de la eda medieval, prima adotada como la spada de la periodo de migras, e sola sola en la eda medieval tarde, lo ia developa a la spada clasica con garda de mano.

La usa de la spada es nomida spadoria o, en un contesto moderne, scrima. En la periodo moderne temprana, la spada ueste ia diverje a du formas fundal: la spadas puxante e la sabres, cual es spadas taliante, e comun con un punto.

La spadas puxante como la stoco, e ultima la spadeta, ia es desiniada per lansi sua ojetos rapida e aplicante feris profunda. La desinia longa, reta, ma lejera e con bon ecuilibria, ia dona ce los es manobrable e matante en un duel, ma alga nonefetosa cuando usada en un move taliante. Un salta e puxa rapida e bon dirijeda pote fini un duel en secondos con sola la punto de la spada, cual ia condui a la developa de un stilo de combata cual semble multe la scrima moderne.

La sabre e spadas simil ia es plu pesosa e ia es plu comun usada en gera. Fabricada per talia e axi enemis multiple, comun montada sur un cavalo, la lama longa e curvida e sua pesia plu fronte, ia dona a lo un cualia matante a la campo de batalia. La plu de sabres ia ave ance puntos acu e lamas con du bordas acu, permete ce los es usada de perfora soldato pos soldato en un ataca de cavalores. La marina american ia reteni des miles de sabres en sua armeria an en la Gera Mundal du, e multe ia es donada a la infantria de marina en la gera a la Mar Pasifica como matxetes en la junglas.

Armas noneuropean cual es nomida "spada" inclui lamas con un borda como la simitar de asia Sude-ueste, la dao de Xina, e sua cusin, la catana de Japan. La jian de Xina es un esemplo de un spada con du bordas, como la varias european cual ia es derivada de la spada de la eda de fero. En Asia sude, sude-ueste, e sude-este, e Africa norde, la spadas ia evolui simil a los de Europa. Con la estende de la arabis e la europeanes colonial, spadas variosa ia es ance adotada par la popla de Africa sude e par la americanes orijinal.