Sal

En usa comun, sal es un mineral composada xef de clorido de sodio (NaCl). Cuando usada en comedas, spesial en forma granetin, lo es plu formal nomida sal de cosina. En la forma de un mineral cristal natural, sal es ance conoseda como halito. Sal es esensal per la vive, e la sabor salosa es un de la sabores fundal de umanas. Sal es un de la spises la plu vea e la plu comun en comedas, e lo boni uniforma la persepi de la sabor de comedas, incluinte comedas cual ta es nonsaborosa sin lo. Sali e marini es metodos antica e importante per conserva comedas.

Alga de la indicas la plu temprana de la prosede de sal es de sirca 6000 AEC, cuando persones abitante en la area de Romania presente ia boli acua de fonte per estrae sales; un saleria en Jonguo es de aprosima la mesma periodo. Sal ia es ance valuada par la ivris, elinicas, romanes, bizantianes, hititas, ejiptianes e indianes antica. Sal ia deveni un ben importante e ia es transportada par barco a ultra la Mar Mediteraneo, longo vias de sal spesial construida, e a ultra la Sahara en caravanes de cameles. La manca e la nesesa universal per sal ia causa ce nasiones vade a gera per lo e usa lo per colie revenu de imposta. Sal es usada en rituos relijiosa e ave otra sinifias cultural e tradisional.

Sal es otenida de minas de sal, e par la vapori de acua de mar (sal de mar) e acua de fonte rica con minerales en stanges basa. La usa la plu grande de sal (clorido de sodio) es como un materia prima per la produi de cimicales. Lo es usada per produi idrosido de sodio e cloro; lo ance es usada en la prosedes de fabrica de clorido de polivinil, plasticas, pulpa de paper e multe otra produidas. De la produi global anial de sirca tresento milion tones de sal, sola un persento peti es usada per la consuma umana. Otra usas inclui prosedes per condisiona acua, la dejela de autovias, e la usa en cultiva. Sal comable es vendeda en formas como sal de mar e sal de cosina, de cual la ultima conteni usual un ajente antiagregante e pote es iodida per preveni la nonsufisi de iodo. En ajunta a sua usa en cosini, sal es presente en multe comedas prosededa.

Sodio es un elemento esensal per la sania umana par sua rol como un eletrolito e un disolveda osmosal. Ma, la consuma esedente de sal pote crese la risca de maladias cardiovascular, como ipertensa, en enfantes e adultes. Tal efetos de sal a la sania es ja longa studiada. Donce, multe asosias de sania mundal e espertas en paises developada recomenda la redui de la consuma de comedas salosa popular. La Organiza Mundal de Sania recomenda ce adultes consuma min ca 2000 mg de sodio, o 5 grames de sal, per dia.