Sahara

De Vicipedia
Un foto de spasio de la Sahara
Un parte de la Sahara en Libia ueste

La Sahara es la deserto calda la plu grande e la deserto tre en la mundo, pos Antartica e la Artica. Sua are de 9,200,000 km2 es comparable con la area de Xina o la SUA. La nom Sahara es derivada de un parola en arabi dialetal per "deserto", ṣaḥra (صحرا /ˈsˤaħra/).

La deserto composa un parte grande de Africa norde, escluinte la rejion fertil a la costa de la Mar Mediteraneo, la Montes Atlas de la Magreb, e la vale de la Rio Nil en Egipte e Sudan. Lo estende de la Mar Roja en la este e la Mediteraneo en la norde a la Mar Atlantica en la ueste, do la tereno cambia de deserto a planos costal. A la sude, lo es bordada par la Sahel, un banda de savana tropical semiseca sirca la vale de la Rio Nijer e la rejion sudani de Africa susaharan. La Sahara pote es divideda entre alga rejiones incluinte la Sahara ueste, la Montes Ahaggar sentral, la Montes Tibesti, la Montes Air, la Deserto Tenere, e la Deserto Libian.

Per alga sentomiles de anios, la Sahara ia alterna entre deserto e savana en un siclo de 41 mil anios causada par cambias en la ase de Tera cuando lo rota sirca la Sol, cual cambia la loca de la monsones african. On espeta ce lo deveni verdi en sirca 15 mil anios de aora, pd sirca 17 mil ec. Lo es sujesteda ce la tempo presedente en cual la Sahara ia cambia de savana a deserto ia es partal causada par la usa suprapasante de la pasto par bestias de la popla local.

Cultures[edita | edita la fonte]

Du cultures preistorial ia es descovreda en areas de Sahara aora nonabitada: La cultur cifian e la cultur tenerian. La cultur cifian ia esiste entre 8000 e 6000 aec en la Sahara. Lo desapare pos 6000 aec, cuando la Sahara ia entra un periodo seca per la mil anios seguente. Sirca 4600 aec, la tenerianes ia comensa. Sua restas indica ce los ia ave rituos relijiosa per onora la mor.

En la eda neolitica, en la milenio sinco aec, la popla ci ia abita la area aora nomida Nubia ia partisipa plen en la "revolui de cultiva", completa con un vive no vagante con plantas e animales domada. Ante 6000 aec, egiptianes predinastial en la area de Egipte sude-ueste ia es pastori bestias e construi casas grande. En la colonias organizada e permanente, susiste ia sentri xef sur cultiva de sereal e la doma de boves, capras, porcos, e oveas.

Per milenia, la popla berber ia abita - e abita ancora - multe de la Sahara. La berberes de la tribu de garamantes ia construi un impero en la cor de la deserto sirca 500 aec. E la nomades tuareg - un federa de tribus berber - continua abita e move tra la surfases vasta de la Sahara asta aora.