Roba

De Vicipedia
Jump to navigation Jump to search

Un roba es un veste portada tradisional par femes o xicas composada de un falda con un camisa juntada, o de un peso de stofa. Lo pote covre la brasos, la spalas, e la gamas intera, o sola la tronco de la clavicula plu alga de la coxa, e tota posibles entre estas. Los varia multe, dependente de la clima, la acaso, la cultur, la moda, timidia, o la preferes de la person portante.

En la sentenio 11, femes en Europa ia porta robas simil a la camisones de la omes, laxe, con un orlo su la jenos o plu longa. Per la fini de la sentenio, robas ia es plu streta a la brasos e la tronco supra la taie. Lo ia ave talias a la lados con cordas cual es tirada streta per conforma a la forma fema.

Comensante en la desenio de 1550, femes de la clases media e alta en Europa ia porta robas cual ia inclui un camison, un corseta o jaceta (kirtle), mangas, fronsidas a la colo, un covre per la peto (partlet), e la roba mesma. Vestetas no ia es portada a su. En England, la tipos de robas permeteda ia depende de Rea Elizabeth. En la sentenio 16, robas ia mostra ance decoras como brodes.

Nederland, como un sentro de produi de stofa, ia es un loca de inova en moda en la sentenio 71. En Espania e Portugal, femes ia porta un stomaco, un peso triangulo de stofa ornosa cual es poneda su la fronte abrida de la jaceta o roba. En England e Frans, robas ia deveni formida plu "natural". Dentela e talias ia es decoras popular. La faldas de robas ia es plen, con plias regulada e un falda esterna cual ia permete la mostra de un falda inferior de stofa contrastante. Brode cual refleta la descovres siensal, como animales e plantas nova descovreda, ia es ance popular. En la colonias brites, robas de multe pesos ia es ance popular, an min lusosa. Femes rica cual abita en la colonias espaniol o nederlandes en la Americas ia copia la modas de sua propre paises.

Robas de tre pesos, pd con un vesteta, faldeta, e roba propre, ia es popular asta la 25 anios final de la sentenio, pos cuando la mantua, pd un roba de un peso, ia deveni plu popular. Corsetos ia deveni plu importante su robas per 1680.

Femes laborante, e femes en sclavia en la Americas, ia usa modeles simple per crea robas laxe, longa, e sin taie, faldetas e robas de lino, e robas de coton. La basa de la faldas ia pote es poneda su la banda de taie cuando un fem ia es prosima un foco per cosini o caldi.

En la sentenio 18, femes ia prefere siluetas triangulo e plu grande; faldas ia es plu larga e suportada par faldetas con anelos per estende los. Robas de un peso ia resta popular asta la media de la sentenio. En la desenio de 1760 en Frans, los ia es reduida en grandia. Colores e stofa plu lejera ia es ance favoreda. En America colonial, femes porta plu comun un roba e faldeta, con la falda de la roba abrida per revela a faldeta a su. Femes ia porta ance vestes per monta, cual ia es composada de un faldeta, jaca, e jaceta.

Femes franses de la clase alta de la sentenio 18

La modas de Frans ia deveni rapida cambiante en la parte tarda de la sentenio 18. Tra esta periodo, la longia de robas ia varia sola poca, entre a la talo o a la solo. Entre 1740 e 1770, la robe à la française ia es popular con femes de la clase alta. Pos la Revolui Franses, la "stilo de impero" ia deveni comun. Esta stilo plu simple ia es ance favoreda par Josephine Bonaparted, la sposa de Napoleon. Otra stilos en la periodo de revolui ia inclui robas camisonin e la negligée à la patriot en la colores de la bandera - roja, blanca, e blu.

En la sentenio 19, la robas de femes ia comensa es clasida par la ora de la dia o la intende de la roba. Robas con taies alta ia es popular asta sirca 1830.

Un roba de la stilo de impero, 1800–1805, coton e lino

Robas de la sentenio 19 temprana en Rusia ia es influeda par "clasicisme", e ia es fabricada de stofa magra, algas an semitransparente. Elizabeth Vigée Le Brun ia porta esta robas con un falda a sua talos a su cuando el ia abita en Rusia entre 1785 e 1801, e multe femes rusce ia copia sua stilo. Per la desenio de 1840, femes rusce ia deveni plu interesada en la moda de Europa ueste.

La stilos de robas en Europa crese dramosa a la falda de anelos o suportada par stofa rijida de la desenio de 1860, cuando la plenia ia es drapeda a retro. Robas ia ave un corseto "de dia" con un escota alta e mangas longa, e un corseto "de sera", con un escota basa e mangas multe corta. Faldas de esta periodo ia es multe decorada.

Per dormi, femes en la ueste de America Norde ia porta robas asta la solo de coton blanca con colares alta mostrante decoras. Femes variosa de la americanes orijinal, como la dines e apatxes, ia comensa ajusta a desinia de sua robas per sembla plu la americanes european, ma ajunta sua propre ideas de belia.

Modeles de paper per cose ia deveni fasil otenable en la desenio de 1860, cuando la Butterick Publishing Company ia comensa promove los. La modeles ia es gradida par grandia, cual ia es un inova.

La robas de la eda victorian ia es streta e decorada con plisas e fronsis. Femes en la SUA ci ia es envolveda en la reformas de vestes en la desenio de 1850, ia deveni la sentro de atende, positiva e negativa. Per 1881, la Rational Dress Society ("sosia per vestes razonal") ia es fundida como un reata a la vestes restrinjente de la eda.

Un roba franses per posmedia, sirca 1903, coton e seda

En la sentenio 20 temprana, la stilo popularida par la Gibson Girl ia es prefereda. La parte alta de la robas en la periodo edwardian ia inclui la stilo nomida la "peto de pijon" ia sede a un taie corsetida e un silueta de la forma de un S. Femes ia nomi sua robas "taies" si de un peso, o "camisa taies" si lo es composada de la camisa e un falda. La corsetos ia ave un fore de osos de balena. A casa, femes rica ia porta "robas per te". Estas ia es plu laxe e fabricada de stofa e dentela cara.

Per 1910, la stilo edwardian ia es reponeda par un silueta plu reta. Paul Poiret, un desinior franses, ia ave un efeto grande sur la moda de la eda. Desinias developada par Poiret ia es otenable en botecas peti e ance en botecas de departes. Robas popular de la eda ia es jeneral de un peso e ia inclui robas delicata cual pote es stratida. A sirca la mesma tempo, en la SUA, la American Ladies Tailors' Association ("asosia de taliores de damas american") ia developa un roba nomida la "completa de sufrajeta", cual ia es pratical per labora e move. Un otra inova de la desenio 1910 ia es la vestes fasil otenable de fabriceria.

Taies de robas ia comensa alta e per 1915 ia es su la taie natural. Per 1920, la taie ia es a la nivel de la anca. Entre 1910 e 1920, escotas ia es plu basa e robas pote ave mangas corta o es sin mangas. Femes ci ia labora en la Gera Mundal 1 ia prefere robas plu corta, cual ia deveni ultima la stilo dominante. Con la robas plu corte, la taies ia es plu laxe e la colores dominante ia es negra, blanca, e gris.

Per 1920, la "fem nova" ia es un promove cual introdui stofas plu lejera e robas cual ia es plu fasil per vesti. Femes plu joven ia presenta la stilos cual femes plu vea ia comensa segue. La robas de la desenio de 1920 pote es traeda de supra la testa, e los ia es corta e reta. Lo ia es asetable per porte robas sin mangas en la dia. La robas de la flapper'' ia es popular asta la fini de la desenio.

En la Gera Mundal 2, robas ia es plu grasil e inspirada par la uniformas militar. Pos la gera, la "stilo nova" promoveda par Christian Dior ia es multe influente a la moda de robas per femes per sirca un desenio.

De la desenio de 1970, no tipo singular de robas o sua longia ia domina la moda per periodos longa, con stilos corta e asta la talo comun aparente lado-par-lado en jornales e catalogos de moda.