Camisa

De Vicipedia
Un xico portante un camisa

Un camisa es un tipo de veste cual covre a min la peto, ma comun covre la plu de la corpo superior entre la colo e la taie. La basa de un camisa pote es tan corta como la torso media, o tan longa como la coxa media. La camison, cual estende tipal de la spalas a la coxa media, ia es la forma usada par la plu de popla de eurasia de la imperos antica. Camisones ia es portada par omes e femes en la mundo antica. Con la usa cresente de pantalas e pantalones, la camison deveni plu corta, e en la eda medieval, lo ia deveni plu un camiseta, un vesteta, ca un vesta portada en publica. Lo ia es tipal portada sola par omes. E, en la eda moderna, lo deveni denova un veste per usa en publica, con camisetas semblante la camisa T de oji. Ultima, an la camisa T ia deveni un vesta portada en publica.

La veste la plu vea en la mundo, descovreda par Flinders Petrie, es un camisa de lino de un tomba a Tarkan, Egipte, de la dinastia prima, datida a sirca 3000 aec.

India antica[edita | edita la fonte]

Un sculta de un om joven portante un camison

Figures de la Sivilia de la Vale de Indo mostra femes e omes portante camisones. Un figur nomida la Dama de la trono spinosa mostra du omes con turbanes portante cual pare cono un roba cono con talias vertical cual posible sujesta stofa rijidida. Un disco de oto de la sivilia mostra du omes con camisones simil, teninte du boves par sua codas. Un figur de un diva madrin mostra un fem portante un camison streta e corta.

Elas antica[edita | edita la fonte]

Camisones ia es ance portada en Elas antica, de do la varia roman ia es adotada. La camisones ia es un evolui de la vestes simil, la chiton, chitoniskos, e exomis, tota de cual pote es videda como varias de lunlotra. La camison ia es decorada a la orlo per representa la site-stato en cual el ia vive. La camisones pote es tinjeda con colores briliante, como roja, purpur, o verde.

Roma antica[edita | edita la fonte]

La camison roman (tunica o chiton) ia es adotada par la romanes en la sentenio 3 aec. Lo ia es comun portada par sitadanes e nonsitadanes, e par omes e femes. Sitadanes pote porta lo su un toga, spesial a avenis formal. La camison ia es laxe per omes, de la colo a supra la jeno; lo ia es o streta o laxe per femes, de la colo e estende supra un falda o faldas. La longia de la camison, la usa de bandetas, la largia e la decora, ia indica la prestijia de la portor en la sosia roman.

La celtas[edita | edita la fonte]

Camisones portada par la celtas ia es rejistrada par la istoriste elinica Diodorus Siculus: "...la modo en cual los vesti se es stonante: los porta camisas brodeda e colorida briliante, con pantalones nomida braccae, e capas liada a la spala con un brox, pesosa en la inverno, lejera en la estate. Esta capas es bandetosa o cuadrosa en sua desinia, con cuadros separada ma prosima e en colores variosa."

La germanicas[edita | edita la fonte]

Un camison portada par un geror germanica de la sentenio 4

La popla germanica e celta ci ia abita en partes plu fria ia porta camisones con mangas longa. La camisones depintada sur monumentos roman mostra la camison como vestida supra la testa e estendente a la coxa media o a la jenos. La romanes plu tarda adota esta stilos per se mesma, e los ia continua es usada a la periodo bizantian.

Pos la cade de la Impero Roman ueste, la camisones germanica ia continua es portada. La construi de los ia es plu developada, con un colar streta con un fende de la fronte per vesti lo supra la testa, e un refortinte su la brasos e sirca la dui basa per dona la efeto de un falda esvasante. Ance usada par la vicinges e la normanes, la camison ia continua como la veste jeneral per omes tra la eda medieval, e ia es ancora usada en Noria tan tarda como la sentenio 17.

La eda medieval[edita | edita la fonte]

La camison ia continua como la veste fundal de la bizantianes de ambos jeneras en la eda medieval. La clases alta ia porta otra vestes sur la camison fundal, como la dalmatica, un tipo de camison plu pesosa e corta, ancora portada par ambos omes e femes, o la scaramangion, un vesta per monta cavalos de Persia. Estra la militar, omes e femes de clases alta ia porta camisones cual estende a la talos - pd, esta camisones ia deveni robas. Los ia es comun tinjeda o brodada, o simple cuando stratida a su.

En la eda medieval, la camisas simple e nontinjeda portada prosima la pel e su vestes normal. En arte de la tempo, la camison es sola vidable sur popla umil, como pastores, prisonidas, e repentores. Un camison ia es portada supra la camisa e la pantala, cual pote es acompaniada par calsas. Lana e lino ia es la stofas comun, ma la rica ia porta a veses camisones de seda o un otra stofa con decora de seda.

La eda moderna[edita | edita la fonte]

Blusas, portada par du femes per jua tenis, 1890-1900 Australia

La camisas de la sentenio 16 ia ave comun fronsis, dentela, o brode a la colo o polso. Esta ia continua tra la sentenio 18. En la sentenio 17, la camisas de omes ia es plu vidable, cual contribui alga nota de erotica. Ma la camisa es es prima un veste portada su otra vestes, como jacas. En la sentenio 18 e an 19, la esposa de la camisa ia es videda como vulgar, e a la otra lado, no porta un camisa cuando en sua leto ia es egal vulgar.

En la sentenio 19, camisas colorida ia comensa apare. Los ia es alora videda como vestes casual, per laborores de la clases basa, asta la sentenio 20, cuando camisas colorida ia deveni comun.

Femes european e american ia comensa porta camisas en 1860, cuando la camisa Garibaldi, un camisa roja como los portada par la gerores per libria su Giuseppe Garibaldi ia es popularida par Imperoresa Eugénie de Frans. Camisones femin e lejera, estendeda a la coxa media, ia deveni comun per sportes o eserse.

Un varia de la camisa es la blusa. Un blusa es un camisa lejera cual ia es a ante portada par laboror, campanianes, artistes, enfantes, e spesial par femes. Los ia es tipal fronsida a la taie o anca par un orlo streta, plisas, o sintur, cual resulta en la blusa pendente lejera sur la corpo. Oji, la terma blusa refere per la plu parte a la camisa de xicas e femes, an si la terma es ance usada per camisas lejera de omes, como camisas de poesistes o de cozaces.

La camisa T[edita | edita la fonte]

Un fem portante un camisa T

La camisa T ia evolui de camisetas usada en la sentenio 19. Los dati a alga ves entre la Gera Espaniol-American de 1898 e 1913 cuando la marinas de la SUA ia adotada los como camisetas. Los ia es camisas con colar ronda, mangas corta, de coton blanca, intendeda per porta su un uniforma. Lo ia es portada sin camisa esterna en grupos laborante, sumarinas temprana, o en climas tropical. Otra laborores ia adota los como camisetas, e xicos joven ia porta los en colores e motifes sin camisas. La parola "T-shirt" ia deveni parte de engles american per la 1920s. Aora, los es multe comun tra la mundo per omes e femes.