Radia ioninte
Radia ioninte, incluinte radia nucleal, es composada de particulas suatomal o ondas eletromagnetal cual ave sufisinte enerjia per ioni atomes o moleculas par sutrae eletrones de los.[1] Alga particulas pote viaja a asta 99% de la rapidia de lus, e la ondas eletromagnetal es a la parte de enerjia alta de la spetro eletromagnetal.
Raios gama, raios X, e la parte ultravioleta de enerjia plu alta de la spetro eletromagnetal es radia ioninte, en cuando la ultravioleta de enerjia plu basa, lus vidable, cuasi tota tipos de lus laser, infraroja, microondas, e ondas de radio es radia nonioninte. La borda entre radia ioninte e nonioninte en la area ultravioleta no pote es clar definida, car moleculas e atomes diferente ioni a enerjias diferente.
Particulas suatomal ioninte tipal inclui particulas alfa, particulas beta, e neutrones. Estas es tipal creada par desintegra radioativa, e cuasi tota ave sufisinte enerjia per ioni. Ance on ave particulas cosmal du produida pos cuando raios cosmal interata con la atmosfera de la Tera, incluinte muones, mesones e positrones.[2][3] Raios cosmal ance pote produi radioisotopos sur la Tera (per esemplo, carbono-14), cual a sua ves desintegra e emete radia ioninte. Raios cosmal e la desintegra de isotopos radioativa es la fontes prima de radia ioninte natural sur la Tera, contribuinte a la radia de fondo. Radia ioninte ance es jenerada artifis par tubos de raios X, aseleradores de particulas, e fision nucleal.
Radia ioninte no es direta detetable par la sensas umana, donce strumentos como la contador de Geiger es usada per deteta e mesura lo. Ma, particulas de enerjia multe alta pote produi efetos vidable a ambos materia organica e nonorganica (per esemplo, la lumina de acua en radia Txerencov) o umanas (per esemplo, la sindrom de radia acuta).[4]
Radia ioninte es usada en un varia vasta de campos como medica, enerjia nucleal, rexerca, e fabrica industrial, ma presenta un peril a la sania si on no prende mesuras coreta contra esposa esedente. Esposa a radia ioninte causa dana selulal a texeda vivente e dana a organos. En dosas acuta alta, lo va resulta en ardes de radia e maladia de radia, e dosas de nivel plu basa tra un tempo longa pote causa canser.[5] La Comision Internasional de Proteje Radiolojial (CIPR) publici gidas sur la proteje contra radia ioninte, e la efetos de la asorbe de dosas a la sania umana.
Referes
[edita | edita la fonte]- ↑ World Health Organization (29 April 2016). "Ionizing radiation, health effects and protective measures (in engles)." Retraeda en 22 January 2020.
- ↑ Woodside, Gayle (1997). Environmental, Safety, and Health Engineering. US: John Wiley & Sons. p. 476. ISBN 978-0471109327. Arcivida de la orijinal en 2015-10-19.
{{cite book}}: Manteni de CS1: data autotraduida (link) - ↑ Stallcup, James G. (2006). OSHA: Stallcup's High-voltage Telecommunications Regulations Simplified. US: Jones & Bartlett Learning. p. 133. ISBN 978-0763743475. Arcivida de la orijinal en 2015-10-17.
{{cite book}}: Manteni de CS1: data autotraduida (link) - ↑ Occupational Safety and Health Administration. "Ionizing Radiation - Health Effects | Occupational Safety and Health Administration (in engles)." Retraeda en 2022-06-23.
- ↑ Herrera Ortiz AF, Fernández Beaujon LJ, García Villamizar SY, Fonseca López FF. Magnetic resonance versus computed tomography for the detection of retroperitoneal lymph node metastasis due to testicular cancer: A systematic literature review. European Journal of Radiology Open.2021;8:100372. https://doi.org/10.1016/j.ejro.2021.100372