Proterozoica
La proterozoica es un eon jeolojial cual estende de la apare de osijen en la atmosfera a cuasi a la comensa de viventes complicada (como trilobitos o corales). Lo es la eon la plu longa de la eones, estendente de 2,500 milion anios ante aora (aaa) a 541 milion aaa. Lo es divideda entre tre eras: la paleoproterozoica, la mesoproterozoica, e la neoproterozoica. La nom es un combina de parolas elinica: protero ("plu temprana") e zoica ("vivente").
La avenis bon identifiada de esta eon ia es la move a un atmosfera con osijen en la paleoproterozoica; glasias, cual ia produi la "bal de neva" de la periodo criojenica en la era neoproterozoica; e la periodo eudicarica (635 a 541 milion aaa) cual es marcada par la evolui de multe organismes multiselulal de corpos mol, e cual furni nos con la indicas prima e clar de fosiles de vive sur tera. Lo es segueda par la "esplode cambrian" de viventes.
On ave indicas clar ance de colides e faliones causada par la cratones de la eon arcaica forminte continentes proterozoica. En la proterozoica, on pote vide un supracontinente nomida Rodinia (sirca 1,000 a 750 milion aaa). Lo ia es composada de un serie de continentes juntada a un craton sentral cual va deveni la continente Laurentia, la cor de nosa America Norde.
Formida par la acrete de alga cratones, Gonduana ia es un continente cual esiste de la neoproterozoica asta la jurasica (sirca 180 milion aaa). Lo no es videda como un supracontinente car la teras de Baltica, Laurentia, e Sibir ia es separada de lo.
Sirca la comensa de cumula de osijen libre, viventes complicada de un selula, la eucariotas, e multiselulales ia developa. Esta pote es la resulta de la crese en nitratos osidida cual la eucariotes usa, en contrasta con la sianobaterias. Ance en la proterozoica, la relatas simbiosica prima entre mitocondrios (trovada en cuasi tota eucariotas) e cloroplastos (trovada sola en plantas e alga protistas) e sua ospitores ia evolui.
La fosiles la plu temprana cual ave cualias tipal de fungos dati a la proterozoica, sirca 2,400 milion aaa. Ma nota ce la flori de eucariotas no sinifia ce la sianobateria ia sesa sua esiste; stromatolitos ia ateni sua abunda e diversia la plu grande en la proterozoica, culminante sirca 1,200 milion aaa.
Vide la scala de edas jeolojial per plu.