Proposa ajetivin

De Vicipedia

Un proposa ajetival (acc proposa de relata) es un proposa cual es usada como un ajetivo en la proposa major, e cual altera un de la nomes o formulas nomal en la proposa major. En elefen e multe otra linguas, la loca en la proposa ajetival cual ta es ocupada par la nom en la proposa major es representada par un pronom de relata o, a alga veses, par un averbo de relata. En elefen, como un multe otra linguas, la parolas de relata es la mesma como la parolas de demanda.

Esemplos:

  • La om ci ia abita asi ia vade a Nu Iorc.
  • La poma cual ia cade de mea saco es aora noncomable.
  • La can, cual ave manxas negra, ia morde la polisior.
  • Me padre, ci ia jubila, abita en Mexico.
  • Esta jus, cual Ana ia fa, ave un bon sabor.
  • La fem ci me ama veni de Frans.
  • La robot cual me ia construi no opera.
  • Nos ta vade a mea casa, cual es prosima.
  • La fem de ci nos parla labora a mea ofisia.
  • Tua libro, en cual me ia scrive se nom, es sur la table.
  • Esta fem, de ci sua sposo labora en la banco, es un cocor eselente.
  • Me auto, de cual sua motor es rompeda, es aora dejetada.
  • El pote salta a un metre alta, cual ia surprende me.
  • Me come en Paris, do me abita.
  • El va visita en maio, cuando la clima es bon.
  • Acel es la razona perce Juan ia parti.

Nota ce, en multe casos, on pote usa la parola en loca de la parola con la nom a cual lo refere. Esta ata ta cambia la proposa ajetivin a un proposa nomin. Per esemplo:

  • La fem ci me ama veni de Frans.
> Ci me ama veni de Frans.
  • Me come la tortas cual me gusta.
> Me como cual me gusta.

Lo es ance posible (e probable plu clar) ce on cambia un proposa nomin a un proposa ajetivin par inserta un pronom ante la sujunta:

  • El ci me ama veni de Frans.
  • Me come lo cual me gusta.

Sujuntas cual introdui un proposa ajetivin[edita | edita la fonte]

Cual es un pronom cual refere a un cosa:

  • La casa cual me ia construi, es prosima.
  • La casa en cual nos abita es tro peti.
  • La superstisios cual me ia investiga es riable.
  • Me libro en cual me ia scrive sua nom, es supra la table.
  • El pote salta a un metre alta, cual es surprendente.
  • La libro ce me leje es tro longa.
  • La auto ce ia veni de Italia es multe rapida.
  • La can, ce ave macias negra, ia morde la polisior.
  • La robot ce me ia construi no opera.

Ci es un pronom cual refere a persones:

  • Esta es la fem de ci me ia compra mea auto.
  • A, vide la patetas ci segue sua madre!
  • La om, ci ia abita asi, ia vade a Nu Iorc.
  • Me padre, ci es retirada, abita en Mexico.
  • La fem ci me ama veni de Frans.
  • La fem, de ci nos parla, labora a me ofisia.

De ci es clarida par inclui la determinante de posese ante la nom a cual de ci refere:

  • La fem, de ci sua sposo labora a mea ofisia, es un cosinor eselente.
  • La fem, de ci tu conose sua sposo, labora a mea ofisia.
  • La fem de ci me ia oblida sua nom, es nova a la porta.
  • La fem, de ci tu ia dona la letera a sua sposo, es encantante.

Cuando es un averbo cual sinifia "a cual ora" o "en cual eda" e simil.

  • En la anio cuando me ia nase, la clima ia es multe calda.
  • Me no conose la ora cuando me va departe.
  • El veni en julio, cuando la clima es bon.

Do es un averbo cual sinifia "a cual loca" o "en cual area" e simil.

  • Me come en Paris, do me abita.
  • Me vide la loca do tu es.
  • En la pais do me ia nase, la clima es multe calda.

Como es un averbo cual sinifia "en cual modo":

  • La manera como tu pasea es riable.

Perce es un averbo cual sinifia "per cual razona o intende" o "par cual causa":

  • La fem ia demanda la razona perce la fenetra es rompeda.