Polpo
La polpo es un molusco con corpo mol e oto brasos de la ordina Octopodo. Sirca 300 spesies es reconoseda, e la ordina es grupida con la clase Sefalopodo con calamares, sepidas, e nautilos. Como otra sefalopodos, la polpo es simetre biladal con du oios e un beco, con sua boca a la media de la oto brasos. La brasos es comun nomida tentaculos, ma tecnical, tentaculos es reservada per membros per come, cual polpos no posese. La corpo mol pote cambia rapida sua forma, cual permete ce polpos pote presa se tra fesures e bucos multe peti. Los trae sua oto brasos pos los cuando los nada. Un organo nomida la sifon es usada per respira, feci, e per move par la espulsa de un jeta de acua. Polpos ave un sistem de nervos complicada e un vide eselente, e es entre la nonvertebratos la plu intelijente e diversa en condui de tota nonvertebratos.
Polpos abita rejiones variosa de la mar, incluinte resifes de coral, mares alta, e la basa de mares; algas vive en la zonas mareal e otras a profondones. La plu de spesies crese rapida, maturi temprana, e ave vives corta. En la plu, la mas usa un braso spesialida per pone un paco de spermas direta en la caveta su la capo de la fema, pos cual la mas senese e mori, en cuando la fema depone sua ovos fertilida en un "nido" (tipal un fesur en la rocas) e incuba los asta los emerji, pos cual la fema mori ance. Stratejias per defende se contra predores inclui la espulsa de inca, la usa de camofla, mostras de menasa, la capasia per jeta rapida tra la acua e asconde se, e an engana. Tota polpos es venenosa, ma sola la polpos de anelos blu (Hapalocleno) pote mata umanas.
Polpos apare en mitolojia como monstros de mar, como la kraken de Noria e la akkorokamui de la popla ainu, e probable la gorgon de Elas antica. Un batalia con un polpo grande aveni en la libro "Laborores de la mar" par Victor Hugo. Polpos es comeda en videda como un deleta par persones de multe partes de la mundo, spesia la Mar Mediteraneo e la mares de Asia este e sude-este.