Patagonia

De Vicipedia
Jump to navigation Jump to search
Mapa de Patagonia

Patagonia es un rejion no multe poplida a la fini sude de America Sude, compartida par Arjentina e Txile. La rejion composa la parte sude de la Montes Andes, con lagos, fiordos, e glasias en la ueste, e desertos, savanas, e stepes a la este. Lo es bordada par la Mar Pasifica a la ueste, la Mar Atlantica a la este, e multe corpos de acua cual lia los, como la Streta Magallanes, la Canal Beagle, e la Pasaje Drake a la sude.

La Rios Colorado e Barancas, cual flue de la Andes a la Atlantica, es comun considerada como la limita norde de Patagonia arjentina. La arcipelago de Tera de Foco es a veses incluida como parte de Patagonia. La plu de jeografistes e istoristes loca la limita norde de Patagonia txilean a la Falia Huincul, en la rejion de Araucania.

A la tempo de la ariva de la espanioles, Patagonia ia es abitada par multe tribus nativa. En un parte peti de Patagonia norde-ueste, la popla orijinal ia cultiva la tera. En la resta de la teritorio, la popla vive como xasores-coliores, movente par pasea en la interna o par canoas en la fiordos e canales. Pos la ariva de la espanioles, los adota la usa de la cavalos.

Car Impero Espaniol ia vole esclui colonistes de otra nasiones de entra la area en la pasada, lo coraji colonistes. Txile e Arjentina ia continua coloni Patagonia lente tra la curso de la sentenios 19 e 20 temprana. Esta ia introdui un diminui de la poplas orijinal, sua vives e abitadas ia es disturbada. Disputas entre Txile e Arjentina ia aveni en la sentenio 20. Estra per la borda longa la glasias de Patagonia sude, tota disputas ia es solveda aora.

La economia oji de Patagonia este inclui eleva de oveas e la estrae de olio e gas. En la ueste, pexa, acuacultur de salmon, e turisme domina. Cultural, Patagonia ave un erita variada, incluinte criollo (desendentes de espanioles), mestizo (erita miscada), americanes orijinal, e influes de Europa estra Iberia.