Paradox de Fermi
La fisiciste Enrico Fermi ia indica la paradox seguente en relata con la probablia de la esiste de vive intelijente estrateran:
Si nosa Via Letin conteni a la min un sivilia capas de coloni la galasia, alora la galasia pote es ja colonida tra poca milion anios. Car la Via Letin es multe plu vea ca la sirca 20 milion anios nesesada, tal sivilias debe esiste a cada parte de lo. Ma asta aora nos ia trova no sinia de un tal sivilia (vide SETI).
Modos posible de solve de esta paradox:
- Nos es la sola sivilia tecnolojial en nosa galasia.
Ta ce nos suposa ce la states sur nosa tera es unica. An si on ave alga razonas (per esemplo la esiste de la luna), esta suposa no apare razonante. Otras disputa ce la esiste de vive es probable, ma la developa de intelijentia es estrema nonprobable.
- Coloni interstelal es nonposible.
An si nos no sabe aora un modo de traversa la distantias vera grande interstelal (par causa de la limita de la rapidia de lus), un tempo vera longa esiste per solve esta taxe, e nos veni de comensa la esplora de la universo. En esta caso multe sivilias ta pote esiste sin influe lunlotra.
- Interesa manca.
Nos pote demanda esce un sivilia pote ave interesa a colonia la galasia e comunica interstelal. On pote duta la razona economial e filosofial.
- Nos no nota la sinias.
La usa de sinias de radia es perosa. Si otra sivilias usa xef otra metodos de comunica (per esemplo laser), alora on pote ave sola vera poca radia en esta banda de frecuentias. En otra caso, los pote usa un modo de radia tal nonperosa, cual nos no pote distingui de la ruido de universa. Nos pote descovre sola un sinia vera simple.
- Los ia esiste a otra tempo.
Nos no sabe tra cuanto tempo un sivilia pote esiste. Lo pote es ce sivilias deveni estinguida pos alga tempo en loca de crese. La esiste de un sivilia tecnolojial de sola poca mil anios pote es tro corta per encontra un otra sivilia.
- Los iniora nos.
La otras pote iniora nos, car nos no es sufisinte developada o nos es en un state de developa critical. Nos es cuasi en un "zo galasial".
- Nos iniora los.
Alga persones es convinseda ce viajores ia visita o visita ancora nos planeta. Ma la plu multe prefere iniora indicas de tal avenis.
Esta consideras es nonserta, car nos sabe sola vera poca sur la states nesesada per la developa de vive intelijente. Vide la Formula de Drake.