Panda
La panda jigante (Ailuropoda melanoleuca, leteral "pede de gato, negra e blanca") es un urso nativa a Xina media-ueste e sude-ueste. El es fasil reconosable par la manxas grande sirca sua oios, supra sua oreas, e a traversa de sua corpo ronda. El parteni a la ordina Carnivora, ma 99% de se dieta es bambu. El come ance miel, ovos, pexes, niamas, folias de arboretas, oranias, e bananas cuando los es disponeda.
El abita un pico de cadenas de montanias en Xina sentral, xef en la provinse Sichuan, ma ance en la provinses Shanxi e Gansu. Developas como la cultiva e la desforesti ia forsa la panda jigante a via de la terenos basa do el ia abita en la pasada.
Los es un spesie perilida, cual depende aora de la conservores. Un reporta de 2007 ia mostra ce 239 pandas jigante abita caturada en Xina, e 27 otras abita estra la pais. Estimas de la popla savaje varia: un de los mostra ce sirca 1590 individuas abita savaje, e un studia par analise de ADN en 2006 ia estima un cuantia posable entre 2000 e 3000. Alga reportas mostra ce la cuantia de pandas savaje grandi, ma la Uni Internasional per la Conserva de Natur no crede ce estas sufisi per reclasi la spesie como nonperilida.
En la istoria, la sinia nasional de Xina ia es la dragon, ma en desenios resente la panda jigante ia prende ance esta rol. Se imaje apare en Xina sur multe monetas onoral de arjento, oro e platino.
An si on suposa comun ce la panda jigante es pasosa, el ia ataca umanas a veses, suposable par irita, e no como predor.