Mil e Un Notes

De Vicipedia
(Redirijeda de Notes arabi)
La re e Shahrazad

Un Mil e Un Notes (arabi: أَلْفُ لَيْلَةٍ وَلَيْلَةٌ‎, ʾAlf Laylah wa-Laylah) es un colie de naras de folclor de Asia sude-ueste colieda en arabi en la "Eda de Oro" muslim. La obra ia es colieda tra multe sentenios par autores, traduores, e eruditas de Asia ueste, sentral, e sude, e Africa norde. Alga naras pote es trasada a sua radises en leteratur antica e medieval en arabi, farsi, elinica, ivri, e turces. Spesial, multe ia es naras de folclor de la edas abasan e mamluc, e otras es de la obra Hezar Afsan (mil naradas) de Persia, cual depende partal de elementos de India.

La tema de cada varia de la Notes es la nara cual inclui la otra naras, de la renor sasanan Shahryar e Shahrazad. La re es stonada par aprende ce la sposa de sua frate es nonfidosa; pos descovre ce la nonfida de sua propre sposa ia es an plu furtiva, el comanda ce el es matada. En sua lamenta, el deside ce tota femes es la mesma. El comensa sposi un serie de virjines, ma mata cadun la note seguente, ante ce los ave un oportun per desonora el. Ultima, la vizir, ci furni la virjines per la re, no pote trova plu. Shahrazad, la fia de la vizir, ofre se como la sposa seguente, e sua padre acorda nonvolente. A la note de sposi, Shahrazad comensa un nara, ma no fini lo. La re, curiosa sur la fini, es alora forsada per pospone la esecuta per oia la conclui. La note seguente, la momento ce el fini la nara, el comensa un otra, e la re, ci vole oia la fini de esta nara ance, pospone la esecuta denova. Esta continua per mil e un notes.

La naras varia multe: los inclui naras istorial, naras de ama, trajedias, comedias, poesias, farsas, e formas variosa de erotica. Multe naras inclui djinis, gules, gorilas, sorsores, majistes, e locas de lejendas, cual es comun miscada con persones e jeografia real, e no sempre razonal. Protagonistes comun inclui la califa abasan istorial Harun al-Rashid, sua vizir grande Jafar al-Barmaki, e la poesiste famosa Abu Nuwas, an si esta persones ia vive 200 anios pos la cade de la Impero Sasanan, en cual la naras aveni. A veses, un person en un nara comensa nara otra persones un nara de se mesma, e acel nara pote ave un otra en lo, con la resulta de un texeda stratida per la nara intera.

Varias diferente de la Mil e Un Note ave finis detaliosa diferente: En algas, Shahrazad demanda per pardona, en otras, la re vide sua enfantes e deside ce el no pote esecuta sua sposa, e en otras, alga cosas aveni cual distrae la re. Ma tota fini con la re permete ce Sharazad vive.

La normas de la naror per cual es videda como un suspende pare plu vasta ca en leteratur moderna. En multe casos, un nara para con la eroe menasada con mori o otra turba profonda; en otras, Shahrazad fini en la media de un esplica de un prinsipe astrata de filosofia o un punto complicada de islam; en un caso, el para en la media de un descrive de anatomia umana de Galen. En cada caso, el es mostrada como justida en sua crede ce la curiosia de la re sur la segue va compra un otra dia de vive per el.

An si la varias de Mil e Un Notes, los tende inclui a min alga naras comun:

La mercator e la djini
La pexor e la djini
La portor e la tre damas
La tre pomos
Nur al-Din Ali e Shams al-Din (e Badr al-Din Hasan)
La sicle de la om jibosa
Nur al-Din Ali e Anis al-Jalis
Ali Ibn Bakkar e Shams al-Nahar