Nonsufisi de cor

De Vicipedia
Jump to navigation Jump to search
La cor; nota la ventriculo sinistra, plu comun un parte de nonsufisi de cor

La maladia de nonsufisi de cor aveni cuando la cor no es capas per pompa sufisinte per manteni la flue de sangue per sasia la nesesas de la corpo. Sinia es sintomes de nonsufisi de cor inclui comun dispnea, fatiga esedente, e infla de la gamas. La dispnea es tipal plu mal con eserse, cuando reclina, e pote velia on en la note. Un capasia limitada per eserse es ance un marca comun. Dole en la peto, incluinte anjina, no aveni tipal en nonsufisi de cor.

Causas de nonsufisi de cor inclui maladia de la arterias de la cor, incluinte un infarta miocardial (ataca de cor), ipertensa (presa sangual alta), fibrila atrial (colpa rapida de cor), maladia de la valvas de la cor, usa esedente de alcol, infeta, cardiomiopatia (musculos debil de la cor) de causas nonconoseda. Estas pote causa nonsufisi par cambia o la strutur o la funsiona de la cor. On ave du tipos de nonsufisi de cor. Un es fundida sur la capasia reduida de la ventriculo sinistra per contrata; du es fundida sur la capasia de la cor per destensa. La severia de la maladia es gradida par la severia de la sintomes con eserse.

Nonsufisi de cor no es la mesma como infarta miocardial (en cual un parte de la musculo de la cor mori) o aresta de cor (en cual la flue de sangue para completa). Otra maladias pote ance ave sintomes simil a nonsufisi de cor, incluinte obesia, fali de renes, problemes de figato, anemia, e maladia de tiroide. Nonsufis es diagnoseda par esamina la istoria de la sintomes e un esamina fisical, con confirma par ecocardiografia. Esamina de sangue, eletrocardiografia, e radiografia de la peto pote ance es usosa per determina la causa a su.

Trata depende de la severia e causa de la maladia. En persones con nonsufisi de cor cronica, stable, e nonestrema, trata es composada tipal de altera de modo de vive (sesa fuma, eserse fisical, cambias de dieta) e medisines. En los con nonsufisi causada par malfunsiona de la ventriculo sinistra, on recomenda inibitantes de enzimas convertinte de anjiotensina, blocinte de resetantes de anjiotensina, o valsartan/sacubitril, e blocintes de resetadores beta.

Per persones con nonsufisinte sever, oposantes de aldosterona o idralazina con un nitrato pote es usada. Diuresicas pote es usosa per preveni reteni de fluente e la dispnea resultante. A veses, dependente de la causa, un aparato implantada como un pasmacer o un desfibrilador implantable pote es recomendada. En casos moderada o sever, terapia resincroni cardial o modula de contrata cardial pote benefia. Un aparato de aida la ventriculo o a veses un transplanta de cor pote es fada per los con maladias sever cual continua an si tota otra metodos ia fali.

Nonsufisi de cor es un maladia comun, custosa, e posible matante. En 2015, lo ia afeta sirca 40 milion persones global. Sirca 2% de adultes ave la maladia, e en los con plu ca 65 anios, esta crese a 6-10%. La frecuentias es espetada per crese. La risca de mori es sirca 35% en la anio prima pos diagnose, ma la risca es min ca 10% per los ci survive la anio prima. Esta riscas es simil a los de alga canseres. En la Rena Unida, la maladia es la razona per 5% de la entras urjente a ospitales.

La nonsufisi de cor ia es conoseda de edas antica, con la papiro de Ebers comente sur lo sirca 1550 aec.