Neolitica en India

De Vicipedia
Jump to navigation Jump to search
Figur de un fem de Mehrgarh (5500 a 2400 aec); teracota, 9.5 cm

La neolitica periodo en India e Asia sude jeneral ia comensa sirca 7000 aec. La esemplo prima es la cultur Mehrgar en Balotxistan, Pacistan, cual ia ave cultiva ma no seramica, e dura asta 5500 aec. La eda de neolitica con seramica dura asta 3300 aec, fusante con la cultur Harappan temprana (de la calcolitica a la eda de bronze temprana). De la locas neolitica la plu vea en Inda es Lahuradewa en la rejion de la Rio Ganga media, e Jhusi prosima a la conflue de la Rio Ganga e la Rio Yamuna, ambos datida a sirca la milenio sete aec. On ia descovre resente un otra loca nomida Bhirrana, longo la sistem de la Rio Saraswati en la stato moderne de Haryana en India, cual ia es datida a sirca 7600 aec per sua stratos neolitica.

En India sude, la neolitica ia comensa sirca 3000 aec e ia dura asta 1400 aec. Lo ia es marcada par montones de senes de 2500 aec enla rejion de Andhra-Karnataka cual ia estende plu tarde en Tamil Nadu. Escava comparante en Adichanallur en la distrito Thirunelveli e en India norde ia dona evidentes de un migra a sude de la cultur megalitica. La indica clar plu vea de la esiste de enteras de vasos megalitica ia dati de sirca 1000 aec, e ia es descovreda a locas variosa en Tamil Nadu, notable a Adichanallur, 24 km de Thirunelveli, do arceolojistes ia trova 12 vasos conteninte cranios umana, sceletos, e osos, cascas, granes de ris carbonida, e siseles neolitica, confirmante la presente de la periodo neolitica a 2800 anios ante aora.

Similias de la seramicas en la Sivilia de la Vale Indo, Turcmenistan, e Iran norde de 4300 a 3300 aec de la periodo calcolitica sujeste multe migras e intercambia. En Bhirrana, la loca la plu temprana de la Sivilia de la Vale Indo, brasaletas e puntos de flexas de cupre ia es trovada. La abitantes de Mehrgarh en moderne Pacistan ia fabrica utiles con cupre local entre 7000 e 3300 aec. A la loca de Nausharo, datida a 4500 anios a ante, un fabriceria de seramica en Balotxistan, los ia descovre 12 laminas o fratos de laminas sirca 12 a 18 cm de longia e relativa magra. Esperimentes mostra ce esta laminas ia es fabricada con un indentente de cupre e ia funsiona como un util per talia e formi vasos noncoceda. Analise de petroglifos indica la fabrica de vasos local, ma ance revela la esiste de alga vasos con pasta negra de la Sivilia de la Vale Indo.