Nasionalisme catalan

Bandera cual simboli la promove nasionaliste catalan. Lo ia es creada par Vicenç Albert Ballester combinante la banderas de Catalunia e Cuba. La data no es conoseda e varia entre 1915 e 1917.

Nasionalisme catalan es un promove political cual disputa la reconose de Catalunia o de los Paises Catalan como un nasion.

Istoria

Sentenios 19 e 20

Valentí Almirall, fundor de la catalanisme political.

Asta 1898, la nasionalisme political es cuasi nonesistente. An tal, con la perde de Cuba e Filipinas, comensa la asende de la fanatisme antiespaniol e la vitimisme con la suporta de la burjesia catalan, cual asta acel anio ia es multe espanioliste. La causa xef es ce la 60% de la negosias catalan ia es perdeda en Cuba e, con un crise economial, la poplisme e la nasionalisme ia trova multe suporta. Ante esta, la provinses catalan (e euscara) ia suporta Espania e promove protejisme per sua industrias.

Con la perde de la colonias, la Stato ia nesesa plu impostas e la comersiores catalan ia comensa escuta la mentis de la nasionalistes como "En Madrid los paia min" e "Madrid malspende la mone". Esta razonas es usada an oji, con la slogan "Espanya ens roba" (Espania fura de nos).

La plu parte de la istoria de la nasionalisme catalan es la de la burjesia catalan defendente sua interesas economial e usante la nasionalisme per fa lo. An tal, cuando sua interesas ia es menasada par la nasionalisme, los ia deveni defendores de Espania, como cuando los ia suporta Primo de Rivera e Franco. Esemplo de esta es cuando Francesc Cambo ia publica en 1929 un libro Les dictadures, per defende la tirania de Primo de Rivera o cuando el ia suporta la governa de Franco.

Pos la mori de Franco, nasionalisme catalan deveni sinonim de pujolisme, promove political con Jordi Pujol, presidente de la Generalitat, como sua sentro. El ia crea la Programa 2000, un documento con un gida per estende la nasionalisme catalan a la sosia catalan. Esta documento ia es segueda en la 28 anios ultima con la tolera de la governas espaniol.

Estende ultra Catalunia

Mapa de la nomida "Paises Catalan", idea creada en la dui du de la sentenio 19 e popularida par Joan Fuster en sua obra Nosaltres el valencians. La idea es fundida sur la suposada uni de la lingua catalan e la conseti de ce teras con un mesma lingua debe es unida en un sola teritorio.

La nasionalisme catalan atenta controla la rejiones espaniol de Valensia e la Isolas Balear como ance teras en la frontera con Aragon, sude de Frans e la site sardinian de Alghero. La razona es ce "En esta teras, la abitores parla catalan".

Alga esemplos de esta atenta de ajunta esta teritorios es:

• Cuando Próspero Bofarull ia manipula la Llibre de Repartiments de Valencia, cual nara la divide e repopli de la Rena de Valensia pos sua reconcista, sutraente la nomes cual no ia es catalan. (On debe espresa clar ce "divide" no sinifia "repopli" e, en alga casos, no sempre esta teras ia es repoplida).
• Sua sobrin parla de Corona Catalano-Aragonesa, orijinante esta terma per sustitui la terma istorial "Corona de Aragon".
• Cuando Josep Coroleu, membro de la Real Academia de las Buenas Letras de Barcelona e de la Real Academia Española de la Historia ia publica en 1878 Los Fueros de Cataluña, libro con cual atenta crea un Constitui per la Nasion Catalan, fundinte en la constituis de otra paises (an en la espaniol) e la fueros catalan. En esta obra, la autor considera la nasion catalan como aceles teras do, seguente el, catalan es parlada: Cataluña, la Contias de Rosellon e Cerdania, Valensia e Maiorca.
• Cuando los parla de leteratur catalan, los dise ce la "Sentenio Oro Valensian" es un esemplo de leteratur catalan, cuando la autores de esta periodo sempre indica ce los scrive en "lingua valensian" e an los difere lo de la lingua catalan.

Formas variosa de nasionalisme catalan moderne

Car nasionalisme catalan es un promove vasta, lo pote trova lo en alga formas diferente en la politica corente. La plu de la partitos catalan — la PDECST (partito democrata european-catalan), la ERC (Sinistra republiciste de Catalunia), PSC (partito sosialiste de Catalunia), ECP (nos pote en comun), e CUP (unia populal de aspirores) — adere a catalanisme a grados variante.

Alga de la partitos restrinje sua goles a sola Catalunia, otras xerca la aseta de un unia de la "Paises Catalan", pd la teritorios en cual los dise ce catalan es parlada. Estra Catalunia mesma, otra rejiones, como Valensia e la Isolas Balear, ave sua propre partitos e alias nasionaliste.

Referendos

11 setembre 2012, entre 600,000 (seguente la governa de Espania) e 2 milion (seguente la organizores) persones ia asembla en Barselona, demandante autonomia per Catalunia. Seguente esta, multe munisipas ia declara se como "teritorio libre catalan".

La anio seguente, la Via Catalan ia aveni, composada de un cadena de umanas de 480 km, con 1.6 milion persones suportante la autonomia de Catalunia.

En la eleje per parlamento catalan de 2017, la partitos cual suporta la crea de un stato autonom ia oteni un pluralia de sejas.

En otobre 2017, un referendo nonlegal seguente la Constituida espaniol car sola la governa nasional pote fa lo, ia es presentada par la governa de Catalunia sur la demanda "Esce tu desira ce Catalunia ta deveni un stato autonom en la forma de un republica?". 90% de la votores ia eleje "si". Ma sola 43% de votores cualinte ia vota. La ata de la polisia espaniol, cual ia segue ordinas de la governa sentral de impedi la vota car lo ia es nonlegal, ia causa la feri de sentos de votore. An si algas culpa la protestores, organizas como Amnestia Internasional e Human Rights Watch (vijila per diretos umana) ia defina la atas de polisia como un usa de forsa no nesesada e supraesedente.

Seguente la articlo 155 la autonomia ia es suspendeda.

Anticatalanisme

Alga promoves de grupos de la destra estrema como Espania 2000 ave un odia sever a nasionalistes catalan, e ia crea boicotas de produidas catalan e "listas negra" de catalanes ci suporta un nasion nondependente.

Falsi de istoria

Oji, educa en la comunia autonom de Catalunia es desideda par la governa autonom (nasionaliste) cual es acusada par espanioles de manipula la libros de testo per fundi la ideas nasionaliste. A la otra lado, catalanes sujeste ce la governa de Espania ia atenta cambia istoria per desvalua Catalunia e catalanes.

Alga inventas es:

• Nomi la Corona de Aragon como "Corona catalano-aragonesa".
• Esplica de la Gera de pasa de rena espaniol como un gera entre la rejiones de Castelia e Catalunia en loca de un gera entre la seguores de du monarcias.

Razisme

Valentí Almirall ia dise ce du razas diferente ia abita en la penisola Iberian: la de la Montes Pirineo e la sentro-sude. Acel de la Montes Pirineo, seguente Almirall, ave un "spirito analisal, fundida sur libria, federal" en cuando la otra raza ia es "jeneralinte, fantasior, fan de lusosia, sentraliste e asorbente".

Pompeu Gener ia parla de la catalanes "esente un raza aria" en la resta de espanioles avente sange semita. Nota ce esta ideas es multe antica, e no crededa par la plu de catalanes. En fato, la promovores de autonomia ia es entre la grupos plu odiada par Franco, ci ia ave lias forte con la nazis de Deutxland.

Alga nomes e obras importante

• Valentí Almirall i Llozer, con sua obra Lo Catalanisme. El ia promove la crea de la imno Els Segadors en 1882, la diada (festa nasional de Catalunia" en 1886 e la sardana, en 1892. Padre de la nasionalisme catalan political. En 1885, el presenta un memorial de greuges a la re Alfonso 12 afin el manteni la monopolio catalan a fas de otra industrias stranjer e, con un lista de mentis, justi la desentri de Espania.
• Enric Prat de la Rib: Promovor de pancatalanisme, crede en un raza catalan diferente de la espaniol, promove de odia a Espania,
• Narcís Verdaguer Callís
• Pere Muntanyola
• Francesc Cambó
• Josep Puig i Cadafalch
• Joan Josep Permanyer
• Domènech i Montaner
• Rovira i Virgili: Creor de un istoria de Catalunia falsa
• Pompeyo Gener: raziste, promovor de la idea ce la "raza" catalan es diferente de la espaniol.
• Muntanyola y Prat de la Riba (1894) Compendi de Doctrina Catalanista

“Entre todos habéis creado una historia de Cataluña falsa en su mayor parte y completamente absurda”

Jaume Vicens Vives a Rovira i Virgili, en la Veu de Catalunya, 24 agosto 1935

Alga partitos political

• Lliga Regionalista: Partito political catalaniste ma nunca separatiste car lo ia es la partito e la burjesia catalana e sua ojeto xef ia es defende la interesa economial de sua membros. Tal, los ia suavi sua parla asta scrive un declara Per Catalunya i l'Espanya Gran (Per Catalunia e la Espania Grande).
• Estat Catala
• Esquerra Republicana de Catalunya

Creas de la nasionalistes catalan temprana

• Diada, creada en 1886 par Valentí Almirall i Llozer
• La imno Els Segadors, creada par Valentí Almirall i Llozer en 1882
• La sardana, creada en 1892 par Pepe Ventura, un andalus.

Lia esterna

• La mentis de la nasionalisme catalan