Narval

De Vicipedia
Un narval
Un narval mas con du femas
La sceleto de un narval

La narval (Monodon monoceros) es un balena con dentes de cual la mas porta un denton grande de un dente canin protendente. Lo abita tra la anio en a acuas artica sirca Gronland, Canada, e Rusia. Lo es un de du spesies presente de la familia Monodontidae, con la beluga.

Como la belugas, narvales es de grandia media. Per ambos sesos, no incluinte la denton de la mas, la grandia pote estende de 3.95 a 5.5 metres, con la mases un poca plu grande ca la femes. La pesa promedia de un adulte es 800 a 1600 kg. Per 11 a 13 anios de vive, la mases deveni matur sesal; la femas deveni matur a sirca 5 a 8 anios. Narvales no ave un pina dorsal, e sua vertebras de la colo es juntada como la plu de otra mamales, e no fusada como delfines e la plu de balenas. La denton es usada en la compete entre mases per femes, e per abri bucos en la jelo per respira.

Narvales es trovada xef en la mares artica de Canada, Gronland, e Rusia. Lo es un predor spesialida per abita la artica. En la inverno, lo come pexes, spesial pexes plata, su la jelo densa pacida. En la estate, narvales come xef gados e ipoglosos, con otra pexes. Cada anio, los migra de la baias a la mar alta cuando estate comensa. En la inverno. la mases tufa a veses asta 1500 metres profonda, con tufas cual dura a 25 minutos. Narvales, como la plu de balenas con dentes, comunica con clicas, sibilas, e colpas.

Narvales pote vive asta 50 anios. Los es frecuente matada par sofoca pos es trapida su jelo de mar. Otra causas de mori, spesial entre narvales joven, es de famia e preda par orcas. La cuantia de narvales es su 50,000, e es categorida par la Uni Internasional per la Conserva de Natur como cuasi menasada. Plu resente, estimas de cuantia plu alta ia developa (asta 170,000), donce redui la state a "conserna minima". Narvales ia es xasada per sentenios par la popla inuit de Canada norde e Gronland per carne e ivor, e un xasa susistente regulada continua.