Beluga

De Vicipedia
Jump to navigation Jump to search
Un beluga
La testa de un beluga
La cranio de un beluga
Un beluga madre e enfante

La beluga (Delphinapterus leucas) es un setaseo de la artica e suartica. Lo es un de a du membros de a familia Monodontidae, con la narval, e la membro sola de la jenero Delphinapterus. Lo es ance conoseda como la balena blanca, e es la sola setaseo de esta color.

La beluga es bon adatada per vive en la artica, e donce lo ave cualias anatomial e fisiolojial cual difere lo de otra setaseos. Prima es la color tota blanca, e la asentia de un pina dorsal, cual permete ce lo nada fasil su la jelo. Lo ave un protenda distinguinte a la fronte de sua testa, cual caxi un organo de ecoloca nomida la melon, cual es en esta spesie grande e desformable. La corpo de la beluga es entre lo de un delfin e un balena vera: mases pote crese a 5.5 metres de longia e a 1600 kg de pesa. La beluga ave un corpo cual pare spesa. Como la plu de setaseos, un percenta grande de sua pesa es gras sucutanea. Sua sensa de oia es multe developada e sua ecoloca permete ce lo move e trova bucos per respira su la jelo.

Belugas es sosial e formi grupos de 10 animales promedia. En la estate, los colie en la sentos o an miles en estuarios e acuas costal basa. Lo es nadores lente, ma pote tufa a 700 metres su la surfas. Sua dietas varia, dependente de sua locas e la saison. La majoria de belugas abita en la Mar Artica e la mares sirca America Norde, Rusia, e Gronland. Lo es estimada ce on ave sirca 150,000 belugas en la mundo. Los es migrantes e la majoria de grupos spende la inverno sirca la glasia polal. Cuando la jelo de mar fonde en la estate, los move a estuarios e costas plu calda. Alga grupos es fisada e no migra tra distantias grande en la anio.

La popla orijinal de America Norde e Rusia ia xasa belugas per multe sentenios. Belugas es ance xasada par otras en la sentenio 19 e 20 temprana. La xasas no es controlada par la Comision Internasional de Xasa de Balenas, e cada pais ia developa sua propre regulas en diferente anios. Balenas es alga menasada par estingui.

La spesies ave un grado media de dimorfia sesal, con la mases sirca 25% plu longa ca femas. La mas adulte estende de 3.5 a 5.5 metres, en cuando femas estende de 3 a 4.1 metres. Mases pesa entre 1100 e 1600 kg (e a veses asta 1900 kg), en cuando femas pesa entre 700 e 1200 kg. Los ateni sua grandia masima cuando los ave sirca 10 anios.

Como la plu de balenas con dentes, los ave un caxa a la sentro de sua fronte cual conteni la organo de texeda grasosa per ecoloca. La forma de la testa es no como cualce otra setaseo, estrema bulbin, lobosa e fasil vidable. Un otra cualia es ce la "melon" pote cambia sua forma en la emete de sonas. Los pote cambia la forma par sofla aira sirca sua sinuses per foca la sonas emeteda.