Martin Luther King Jr.
Martin Luther King Jr. (15 janero 1929 - 4 april 1968) ia es un eglesor batiste american e un ativiste ci ia deveni la xef la plu vidable de la promove de diretos sivil de 1954 a sua mori en 1968. Naseda en Atlanta, Georgia, SUA, El ia es la plu bon conoseda per avansa la diretos sivil par nonviolentia e desobedi sivil, taticas cual ia es inspirada par sua credes cristian e la ativisme nonviolente de Mahatma Gandhi.
King ia gida la boicota de la buses de Montgomery en 1955, e ia deveni la presidente prima de la Confere de Xefia Cristian Sude en 1957. Con esta confere, el ia gida un luta nonsusedosa contra separadisme en Albany, Georgia, SUA en 1962, e ia aida en la organiza de la protestas nonviolente en Birmingham, Alabama, SUA en 1963. El ia aida ance organiza la Marxa a Washington en 1963, do el ia presenta sua parla famosa "Me ave un sonia".
A 14 otobre 1964, King ia gania la Preso Novel de Pas per combata nonegalia rasal tra resiste nonviolente. En 1965, el ia aida organiza laMarxas de Selma a Montgomery. La anio seguente, el e la Confere de Xefia ia move la promove a norde a Chicago per labora a la problem de casi separada. En sua anios final, el ia estende sua foca per inclui oposa a povria e a la Gera de Vietnam. E ia aliena multe de sua alias liberal con un parla en 1967 nomida "Ultra Vietnam". J. Edgar Hoover videda el como un radical, cual resulta con el deveni un ojeto de la promove COINTELPRO de la FBI de 1963 e pos. Ajentes de la FBI ia investiga el per lias posible a la comunistes, arcivinte sua lias estrasposal e reportante los a ofisiales de governa, e un ves enviante un letera anomim a King, cual el ia interprete como un atenta a causa sua suiside.
En 1968, King ia es projetante un ocupa nasional de Washington DC, cual ta es nomida la Campania de Popla Povre, cuando el ia es asasinada a 14 april en Memphis, Tennessee, SUA. Sua mata ia es segueda par tumultas en multe sites en la SUA. Aleges ce James Earl Ray, la om cual ia es prisonida per mata King, ia es condenada falsa o an ia ata con la aida de ajentes governal, ia persiste per desenios pos la xuta. Condenada per 99 anios en prison per la mata, Ray ia resta en prison per 29 anios e ia mori de epatite en 1998.
King ia es donada la Medalia Presidental de Libria e la Medalia Congresal de Oro. La dia de Martin Luther King Jr. ia es instituida como un dia santa en multe sites e statos comensante en 1971; la dia ia es instituida par la governa nasional par lege, suscriveda par Presidente Ronald Reagan en 1986. Un monumento en sua nom sur la Bolevar Nasional de Washington DC en 2011.