Maladia de Alzheimer

De Vicipedia
Jump to navigation Jump to search
Un compara de talias traversal de un serebro normal (a sinistra) e un serebro de un person con la maladia de Alzheimer (a destra); la serebro a destra ave redui sever de la cortex, grandi sever de la ventriculos, e redui sever de la area de la ipocampo

La Maladia de Alzheimer es un maladia cronica neurodejenerante cual comensa tipal lente e mali tra tempo. Lo es la causa de entre 60 e 70% de casos de dementia. La sintom temprana la plu comun es difisilia per recorda avenis resente. Cuando la maladia avansa, sintomes pote inclui problemes con lingua, desorienta (pe deveni perdeda), osila de umor, perde de motiva, perde de la capas de autocura, e problemes de condui. Plu tarde, persones con la maladia tende retira de la familia e la sosia. Gradal, la capasia de autocura per la corpo es perdeda, cual condui ultima a mori. An si la rapidia de progresa pote varia, la espeta tipal de dura de vive seguente diagnose es tre a nove anios.

La causa de la maladia de Alzheimer no es bon comprendeda. Sirca 70% de la risca es probable jenetical, con multe jenes envolveda. Otra fatores de risca inclui un istoria de feris de la testa, depresa, o ipertensa. La prosede de la maladia es asosiada con placas e maranias en la serebro. Un diagnose probable es fundida sur la istoria de la maladia e probas cognitive con imaji medical e probas de sangue per sutrae otra cosas posible. Sintomes temprana es comun erada per veia normal. Esamina de texeda de serebro es nesesada per un diagnose serta. Eserse mental e fisical e evita de obesia pote redui la risca, ma evidentes per esta recomendas no es forte. On ave no medisines o ajuntas dietal cual ia es mostrada como redui la risca.

No tratas para o reversa sua progresa, an si alga pote boni tempora la sintomes. Persones afetada depende cresente de otras per aida, comun supracargante la person ci debe cura per los. La presas pote inclui elementos sosial, psicolojial, fisical, e economial. Problemes de condui o psicose resultante de dementia es comun tratada con antipsicosicas, ma esta no es tipal recomendada, car los ave beneficas minimal e crese la risca de mori temprana.

En 2015, on ave sirca 29.8 milion persones tra la mundo con la maladia de Alzheimer. Lo comensa la plu comun en persones supra 65 anios, an si 4 a 5% de casos comensa temprana. Sirca 6% de persones plu ca 65 anios es afetada. En 2015, sirca 1.9 milion moris resulta de la maladia. Lo es un de la maladias la plu cara finansial.

La maladia ia es prima descriveda par, e ia es plu tarde nomida per, la psiciatriste e patolojiste deutx, Alois Alzheimer en 1906.