Linguas pama–niungan

De Vicipedia
Jump to navigation Jump to search
Mapa de la linguas pama-niungan (jala), con relatas posible garaua/tancic (verde) e gunuinjguan (orania)

La linguas pama-niungan es la familia la plu estendeda de la linguas de la australianes orijinal, con sirca 300 linguas. La nom es derivada de la nomes de la du grupos la plu distante de lunlotra: la linguas pama de la norde-este e la linguas niungan de la sude-ueste. La parolas pama e niunga sinifia "umana" en sua linguas.

La familia conta per la plu de la estende jeografial, la plu de la popla orijinal, e la cuantia la plu de linguas individua. La plu de la linguas de la familia es parlada par grupos peti de sentos de persones o min. Multe, ma no tota, es videda como perilida, e multe ia es estinguida resente.

Proto-pama-niungan ia es posible parlada tan resente como 5 mil anios a ante, e multe plu resente ca la 40 a 60 mil anios en cual la australianes orijinal ia abita Australia. Como la familia ia sperde tra la plu de la continente (e donce ia desloca cualce linguas plu temprana) no es serta. Un esplica posible es ce la linguas ia es pasada de un grupo a un otra con cultur e rituos. Multe linguistes ia sujeste ce la familia es plu como un sprachbund (pd, relatada par intercambia, no par erita), estendeda par ondas multiple de contata entre grupos.

A la tempo en cual la europeanes ia ariva en Australia, on ave sirca 300 linguas pama-niungan divideda entre sirca 36 ramos. Esta linguas varia en sua diferes: Algas es cuasi unica e on ta ave un taxe difisil per mostra sua relata a otras; otras es tan simil como la linguas scandinavia.