Lilit

De Vicipedia
Jump to navigation Jump to search
Un depinta de Lilit (1892) par John Collier

Lilit (ivri: לִילִית‎ Lîlîṯ) es un person en la mitolojia iudi, developada la plu temprana en la Talmud babilonian (sentenios tre a sinco). El es comun videda como un demon perilosa de la note, ci es promiscua e furi bebes en la oscura. Lilit pote es liada a un clase de demones fema (lilītu) de la relijones de Mesopotamia, trovada en testos cuneforma de Sumer, la Impero Acad, Asiria, e Babilonia.

En folclor iudi, de un libro satira la Alfabeta de Sirach (700 a 1000 ec) e pos, Lilit apare como la sposa prima de Adam, ci ia es creada a la mesma ora (Rosh Hashanah) e de la mesma arjila como Adam (vide Jenese 1:27), en contrasta con Eva, ci ia es creada de un costela de Adam (Jenese 2:22). La mito ia developa multe en la eda medieval, en la tradision de Aggadah, la Zohar, e misticisme iudi. Per esemplo, en la scrives de Isaac ben Jacob ha-Cohen de la sentenio 13, Lilit ia parti de Adam pos ce el ia refusa deveni sclavin a Adam e alora no desira reveni a la Jardin de Eden pos copula con la arcanjel Samael.

Evidentes en testos iudi plu tarde es comun, ma poca informa ia survive cual relata a la vide sumer, acad, asirian, e babilonian de esta clase de demones. An si la junta es acordada cuasi universal, studias plu resente ia disputa la pertine de du fontes presedente usada per lia la Lilit iudi a la demones lilitu (pd la apendis de Gilgamesh e la joalas majiosa de Arlsan Tash.

En testos en a lingua ivri, la parola litith o lilit (traduida como "viventes, monstros, o arpias de la note", o como "tito xiliante") aveni prima en un lista de animales en Isaia 34-14. En la Enrolas de la Mar Mor, la parola aveni prima en un lista de monstros. En la enscrives majiosa iudi sur boles e joalas majiosa de la sentenio ses ec e seguente, Lilit es identifiada como un demon e la imajes prima apare.

La lejenda resultante de Lilit continua como un fonte de materia en la cultur e leteratur moderne de la ueste, incluinte ocultisme, fantasia, e filmas de teror.