Libelula

De Vicipedia
Un damisel blu comun

Libelulas es un grupo de insetos carnivor cual composa la ordina Odonata e la supraordina Odonatoptera. Los pote es multe grande, cual es la inspira per nomes comun como "moscas de diablo" e "moscas dragonin". La libelula la plu grande es la "libelula jigante" (ance conoseda como la "elicotor") de America sentral (Megaloprepus coerulatus), con un estende de la alas de 19 cm.

Libelulas e sua ansedentes veni de un de la grupos de insetos con alas la plu vea. La fosiles de los e sua cusines, como la Meganeuropsis permiana de la periodo permian de America Norde, pote es an plu grande ca la "elicotor", con un estende de alas de 71 cm e un longia de corpo de 43 cm. Lo ia es posible la inseto la plu grande de tota edas.

La ordina ave du suordinas: Anisoptera e Zygoptera. La prima es comon nomida "libelulas vera" e la otras "damiseles" (de un parola franses vea per "senioreta"). Libelulas vera es jeneral plu grande, e resta con sua alas estendeda a cada lado; Damiseles ave corpos magre, e teni sua alas vertical supra sua corpo cuando restante.

Esta insetos ave tipal testos grande e ronda, covreda cuasi completa con oios composada multe bon developada. Los ave gamas cual fasili la catura de otra insetos en vola, du duples de alas longa e transparente cual move autonom de lunlotra, e adomenes estendeda. Los ave tre oietas e antenas corta. La partes de la boca es a la basa de la testo e inclui mandibulas simple per mastica en la adulte.

Libelulas es acual o semiacual cuando jovenes. Per esta causa, adultes es videda la plu comun prosima a acua. Ma alga spesies estende se distante de acua. Los es carnivor tra sua vive, comente xef insetos plu peti. Libelulas pote ata como bioindicantes de la cualia de acua en rios car los depende de acua de cualia alta per developa en sua vive temprana. Car sua dieta es composada intera de insetos, la densia de libelulas es proportial direta con la popla de sua predas.