Impero Maurian

De Vicipedia
Jump to navigation Jump to search
La estende de la Impero Maurian
La leones de la colonas de Ashoka a Sarnath

La Impero Maurian (मौर्य राजवंश Maurya Rājavśa) ia es un potia estendosa de la eda de fero, fundida par Chandragupta Maurya en Magadha, cual ia domina India antica entre 321 aec e 187 aec. Conteninte la majoria de Asia sude. Sua site capital ia es Pataliputra (aora Patna). Lo ia estende sur sinco milion km2 a sua culmina su Ashoka (pronunsiada "Axoca").

Chandragupta Maurya ia crea un armada, aidada par Chanakya (ance nomida Kautilya) e ia suverti la Impero Nandan en sirca 322 aec. El ia estende rapida sua potia a ueste tra India sentral e ueste par concista la satrapias restada par Alexandro la grande, e par 317 aec, ia ocupa completa India norde-ueste. La impero alora ia vinse Seleucus un, un diadoco elinica e fundor de la Impero Seleucan, en la Gera Seleucan-Mauryan, ganiante tal plu teritorio a la ueste de la rio Indus.

La impero ia es un de la imperos la plu grande en India. Lo ia estende a la norde longo la Himalaias, a la este en Asam, a la ueste en Balotxistan e la montes de la Hindu Cux. La impero ia estende a en la sentro de India e ta inclui Kalinga (aora Odisha) cuando lo ia es concistada par Ashoka. Lo declina per sirca 50 anios pos Ashoka, e ia disolve en 185 aec con la fundi de la dinastia Shungan en Magadha.

Su la domina par Chandragupta Maurya e sua seguentes, comersia, cultiva, e economia ia flori en India, beneficante de la crea de sistemes de finansia, governa, e securia singular e efetosa. Pos la gera con Kalinga, la impero ia vide cuasi dui un sentenio de pas e securia su Ashoka. India ia joia ance un eda de armonia sosial, cambias de relijio, e estende de siensa. Chandragupta Maurya ia adota jainisme e Ashoka ia adota budisme, cual ia promove un pas sosial e political. Ashoka ia promove la sperde de misiones budiste a Srilanca, Asia sude-este e ueste, Africa norde, e Europa mediteraneo. Lo es an posible ce monces budiste ia influe la filosofias e relijios de la mundo elinica.

La cuantia de popla de la impero ia es estimada como 50 a 60 milion, cual ia fa ce la Impero Mauryan ia es un de la imperos la plu multe poplada de anticia. Arceolojial, la periodo ia es en la eda de la vasos negra briliada norde. La Arthashastra e la Proclamas de Ashoka es la arcivos xef de la eda mauryan. La Leones de Ashoka a Sarnath es la simbol nasional de India moderna.