Halma

De Vicipedia
La table per halma; la cantos es marcada per 2 juores (verde) o 4 juores (roja)
Moves per la peso blanca legal (verde) e nonlegal (roja)

Halma (de la parola elinica ἅλμα ("salta") es un jua de stratejia inventada en 1883 o 1884 par George Howard Monks, un sirurjiste american a Harvard Medical School. Sua inspira de deriva de un jua engles nomida hoppity, cual ia es inventada en 1854.

La table per la jua es divideda entre 16 par 16 cuadros (ma pote es juada a otra tables). Pesos es tipal simil a la peones de xace de lenio o plastica, en negra e blanca per 2 juores o otra colores en juas per plu juores. Halma es juada par 2 o 4 juores ci es sentida a cantos oposante de la table. La ganior es el ci es la prima per move tota sua pesos de sua propre campo a la campo direta oposante. Per 4 juores, si juada como ecipos, la ganior es la ecipos cual pote move ambos sua pesos a la campos oposante. A cada turno, un juor move un peso a un cuadro vacua juntada, o salta supra un o plu pesos seguente.

Prepara[edita | edita la fonte]

  • La campa de cada juor es composada de un grupo de cuadros juntada en un canto de la table, indicada par linias o colores.
  • Per juas de 2 juores, cada campo es un grupo de 19 cuadros en cantos oposante.
  • Per juas de 4 juores, cada campo es un grupo de 13 cuaros a cada de la cantos de la table.
  • La jua comensa cuando la campos de cada juor es plenida par sua propre pesos.

Jua[edita | edita la fonte]

  • Pesos pote move en 8 dirijes posible, ortogonal o diagonal.
  • Un turno de un juor es composada de move un peso de sua propre color en un de la moves seguente:
    • Un move a un cuadro vacua juntada;
    • Un o plu saltas sur pesos juntada;
    • On pote salta supra sua propre pesos o la pesos de un juor oposante;
    • La peso o pesos supra cual on salta no es sutraeda e resta sur la table;
    • Pos salta supra un peso, on pote salta en la mesma modo supra plu pesos;
    • Pos un peso ia ateni la campo oposante, acel peso pote move, ma no pote sorti de la campo.
  • Si un juor move sua peso final en la campo oposada, acel juor gania la jua.

On ave ance varias de 8 par 8 e 10 par 10 cuadros, ambos es sufisinte per du juores con 10 o 15 pesos per juor.

Ugolki[edita | edita la fonte]

🔴 🔴 🔴 🔴
🔴 🔴 🔴 🔴
🔴 🔴 🔴 🔴
🔴 🔴 🔴 🔴
⚫️ ⚫️ ⚫️ ⚫️
⚫️ ⚫️ ⚫️ ⚫️
⚫️ ⚫️ ⚫️ ⚫️
⚫️ ⚫️ ⚫️ ⚫️

Ugolki (rusce: Уголки, "canto") es un jua per du juores, simil a halma, tipal juada sur un table de 8 par 8 cuadros, con 16 pesos per cada juor. Lo ia es inventada en Europa este en la sentenio 18 tarda.

La jua comensa con ordinas de sua 16 pesos, ordinada 8 par 8, en la cantos oposante de la table. La gol de cada juor es move tota sua pesos de la canto orijinal a la canto oposante. La moves es esata la mesma como en halma. La jua fini cuando no plu moves esiste. La cuantia de pesos en la cantos final es contada e la juor con la plu pesos a la sua canto final gania la jua.

Sternhalma[edita | edita la fonte]

Sternhalma con tre juores
La table per sternhalma

Sternhalma (deutsch per "halma de stela") es un jua de stratejia, orijinal de Deutxland, cual pote es juada par 2 a 6 persones, juante individua o en ecipos. La difere plu notable entre sternhalma e halma es la table: Sternhalma usa un table en la forma de un stela con ses puntos, e la "cuadros" es esagonal. Esta resulta en un peso ave un eleje de asta 6 dirijes per move. Cada juor ave 10 pesos, o 15 cuando sola du juores jua.

La gol es per es la prima juor (o ecipo) ci ia move tota sua pesos ultra la table a la punto de la stela a la otra punto de lo en cual el ia comensa. Moves es como en halma, a un esagon vacua, o un serie de saltas supra sua propre pesos o la pesos de un otra juor. La resta de la juores o ecipos continua juante, per indica ci es juor 2, 3, 4, 5, o 6. La regulas es multe simple, e an enfantes joven pote jua.

La nom en engles es chinese checkers, cual sinifia "damas xines", e lo ia es introduida par la Pressman Company en 1928 en la SUA, an si la jua no es un varia de damas e no es xines. En Japan, la jua es nomida "jua diamante" (ダイヤモンドゲーム). La japanes ia introdui la jua a Xina.