Gerhart Hauptmann

De Vicipedia
Jump to navigation Jump to search
Gerhart Hauptmann.jpg

Gerhart Hauptmann (1862–1946) ia es un dramiste deutx. El ia es un defendor ostinante de naturalisme en teatro, e sua obras ia es multe presentada. La tesores (deutx: Die Weber), sua teatral la plu bela, es un descrive de la revolta de la tesores silesian en 1844. Sua otra teatrales inclui Ante lus prima (Vor Sonnenaufgang, 1889) sur la vive dur de la laborores silesian, la comedia La jaca de castor (Der Biberpelz), e un trajicomedia sur criminales de Berlin, La ratas (Die Ratten). El ia gania la premio Nobel de leteratur en 1912.

Hauptmann ia nase en Obersalzbrunn, e ia studia arte en Breslau. Pos un periodo a la Universia de Jena, e pos viaja en Europa, el ia deveni un scultor en Roma. La campana afondada (Die versunkene Glocke, 1896) es un teatral fablin de introspeta, ma La viaja de Hanne peti a sielo depinta la vides febrosa de un enfante morinte.

Sua dramas sosial realiste inclui Fuhrmann Henschel (1898). Heinrich la povre (Der arme Heinrich, 1902) es un drama istorial, fundida sur un poesia medieval par Hartmann von Aue. Pos la ariva de la rena nazi, Hauptmann ia es senesente e no multe preocupada par consernas political e sosial. El ia scrive ance alga pesos surealiste como La mervelia de mar (Das Meerwunder, 1934) e La sonia grande (Der grosse Traum, 1942).