Forte (fisica)

On pote descrive fortes como un puia o tira a un ojeto. Los pote es causada par fenomenos como gravita, magnetia, o cualce cosa cual pote causa ce un masa aselera.

Un forte es un influe cual pote causa ce un ojeto cambia sua rapidia estra si contrapesada par otra fortes. La conseta de forte fa ce la idea comun de puia o tira es matematical esata. Car la grandia e la dirije de un forte es ambos importante, forte es un cuantia vetoral. La unia SI de forte es la neuton (N), e forte es frecuente representada par la simbol F.

Forte jua un rol importante en mecanica clasica. La conseta de forte es sentral a tota tre de la leges de move de Newton. Tipos de fortes frecuente encontrada en mecanica clasica inclui elastica, fricante, contatante o "normal", e gravital. La varia jirante de forte es torse, cual produi cambias en la rapidia de jira de un ojeto. En un corpo estendeda, cada parte aplica frecuente fortes a la partes visina; la distribui de tal fortes tra la corpo es la tensa interna. En ecuilibra, esta stresas causa no aselera de la corpo car la fortes ecuilibra lunlotra. Si estas no es en ecuilibra, los pote causa desformi de materias solida, o flue en fluentes.

En fisica moderna, cual inclui relativia e mecanica cuantal, la leges cual governa move es revisada per depende de interatas fundal como la orijina ultima de forte. Ma la comprende de forte furnida par mecanica clasica es usosa per intendes pratical.