Erasmo

De Vicipedia
Un depinta de Erasmo par Hans Holbein

Desiderius Erasmus Roterodamus (28 otobre 1466 – 12 julio 1536), conoseda como Erasmo, ia es un umaniste cristian de Nederland ci ia es la erudita la plu grande de la Renasa norde. Orijinal educada como un prete catolica, Erasmo ia es un figur importante en eruditia clasica ci ia scrive en un stilo pur latina. Entre umanistes, el ia reseta la nometa "Prinse de la Umanistes". El ia prepara editas importante nova de la Atesta Nova en latina e elinica, cual inclui demandas cual ta es influente en la Reforma Protestante e la Contrareforma Catolica. Entre sua scrives es "Sur vole libre", "Un loda de folia", "Manual de un cavalero cristian", "Sur cortesia en enfantes", e multe otra obras.

Erasmo ia nase en Rotterdam, Nederland a 28 otobre 1466. Sua padre, Gerard, ia es un prete catolica e aidante relijiosa en Gouda. Sua madre ia es Margaretha Rogerius, la fia de un dotor medical de Zevenbergen e posible la manejor de casa per Gerard. An ce Gerard e Margaretha no ia es legal sposida, Sua jenitores ia cura per Erasmo asta sua moris temprana de la pesta en 1483. Esta aveni fa ce Erasmuo adota un tristia e tende sombre cual segue el tra sua vive.

Erasmo ia reseta la educa la plu bon posible per un joven de sua eda, en un serie de scolas moncal o cuasi moncal. Cuando el ia ave nove anios, el e sua frate plu vea ia es enviada a un de la scolas latina la plu bon en Nederland, locada a Deventer, partenida par la eglesores de Lebuinuskerk.

En 1487, povria ia forsa probable ce Erasmo ta entra la vive santa de un prete regulada de San Augustino a Stein en Holland Sude. El dona sua juras ala en 1488 tarde, e ia es ordinada en la pretia catolica cuando el ave 25 anios. Lo pare ce el no labora multe como un prete vera.

En 1495, con la permete de Bispo Henry e un salario, Erasmo ia vade per studia a la Universia de Paris, en la Collège de Montaigu, un sentro de reforma zelosa. La Universia ia es alora la loca xef de studia scolastica, ma ja veninte su la influe de la umanisme de la Renase. Per esemplo, Erasmo ia deveni un ami intima de la umaniste italian Publio Fausto Andrelini, un poesiste e "profesor de umania" en Paris.

Erasmo ia vive en un eda de reforma relijiosa cresente en Europa. An si el ia es critical de la malusas en la Eglesa Catolica e ia clama per reforma, el ia manteni sua distantia de Martin Luther, Jean Calvin, e Re Henry 8, e ia continua respeta la autoria de la pape, asentuante un via media con un respeta profonda per la fide, relijiosia, e la grasia tradisional, e rejetante la asentua par Luther sur fide sola. Erasmo resta un membro de la Eglesa Catolica tra sua vive, restante dedicada a la reforma de la eglesa e la malusas de sua eglesores, sin parte de la eglesa.

El ia teni ance a la dotrina catolica de vole libre, cual alga reformores ia rejeta per la dotrina de predestina. Luther ia insiste ce "vole libre no esiste" (en sua letera "De Servo Arbitrio"), car peca fa ce umanas es tota noncapas de trae se a Dio. Per Erasmo, la punto esensal es ce umanas ave la libre de eleje la via de peca o la via de Dio.

Alga obras de Erasmo ia forma la funda per tolera relijiosa e la idea de ecumenisme. Per esemplo, en "De libero arbitrio", oposante Luther, Erasmo ia nota ce disputantes relijiosa debe es tempera en sua parla, "car en esta modo la veria, cual es comun perdeda entre tro multe dispute pote es plu serta persepida". Gary Remer ia scrive "Como Cicero, Erasmo conclui ce veria es promoveda par un relata plu armoniosa entre debatores". An ce Erasmo no ia oposa la puni de ereses, en casos individua, el ia razona per modera e contra la puni de mori. El ia scrive "Lo es plu bon per cura un om malade ca per mata el".

Jan van Herwaarden ia oserva ce "el no ia rejeta la rituos santa despetosa, ma ia declara ce un person morinte pote ateni un state de salva sin la rituos pretal, si sua fide e spirito acorda con Dio." Erasmo ia mori subita en Basel en 1536 en cuando preparante per reveni a Brabant. El ia es enterada ala con multe seremonia en Basel Minster (la catedral pasada). Sua parolas final, recordada par sua ami Beatus Rhenanus, ia es "Cara Dio" (nederlandes: Lieve God).

Un sculta de Erasmo ia es erijida en la site de sua nase en 1622.

"Cuando me reseta alga mone, me compra libros; e si caulce resta, me compra comedas e vestas." - Erasmo

Obras[edita | edita la fonte]

  • Adagia (1500 etc)
  • Enchiridion militis Christiani (1503)
  • De loda de folia (1511)
  • De copia (1512)
  • Disticha de moribus nomine Catonis (1513); editada e traduida plu tarde par Miguel Serveto
  • Sileni Alcibiadis (1515)
  • Novum Instrumentum omne (1516); la varia moderne e critical prima de la Atesta Nova elinica
  • La educa de un prinse cristian (1516)
  • Bellum (esaia, 1517)
  • Colloquia (1518, etc)
  • Lingua, Sive, De Linguae usu atque abusu Liber utillissimus (1525)
  • Ciceronianus (1528)
  • De recta Latini Graecique sermonis pronuntiatione (Dialogo sur la pronunsia coreta de latina e elinica, 1528)
  • De pueris statim ac liberaliter instituendis (1529)
  • Sur cortesia en enfantes (1530)
  • Consultatio de Bello Turcis Inferendo (1530)
  • Un esplica o declara simple e relijiosa de la crede comun (1533)
  • Ecclesiastes (1535)
  • De octo orationis partium constructione libellus (1536); editada e traduida plu tarde par Miguel Serveto.
  • Apophthegmatum opus (1539)