England anglosason

De Vicipedia
Jump to navigation Jump to search
British kingdoms c 800.svg

En la istoria de Britan, la terma England anglosason refere a la pais istorial prosima a England moderna, cual ia esiste de la sentenio 5 a la 11, ma sin inclui la rena de Dumnonia (Devon e Cerneu) asta la sentenio 9.

La anglosasones ia es membros de la grupos parlante linguas germanica ci ia migra a la dui sude de Europa continental, e sua desendentes cultural. La istoria anglosason comensa en la periodo de Britan posroman pos la fini de la controla roman, trasa la stabli de la renas anglosason en la sentenios 5 e 6 (normal identifiada como sete renas xef (Northumbria, Mercia, Anglia este, Essex, Kent, Sussex, e Wessex), sua cristiani en la sentenio 7, la menasa de la vicinges e la colonistes dansce, la uni gradal de England su la ejemonia de Wessex en la sentenios 9 e 10, e fini con la concista normande de England par William la concistor en 1066. La identia anglosason ia survive ultra la concista normande, e ia es conoseda como Englishry su la domina normande, ultima developante a la popla engles moderna.

Terminolojia[edita | edita la fonte]

Beda ia completa sua libro Historia ecclesiastica gentis Anglorum en 731. Tal la termo per la popla engles (latina: gens Anglorum, anglosason: Anglecynn) ia es alora usada per distingui la grupos germanica en Britan de los en la continente.

La istoriste James Campbell ia sujesta ce on no pote descrive England como un nasion-stato ante la fini de la periodo anglosason. Lo es serta ce la conseta de "englia" (Englishness) ia developa sola multe lenta.

Contesto istorial[edita | edita la fonte]

Cuando la ocupa roman de Britan ia es fininte, Constantino 3 ia retira la soldatos restante, como un reata a la invade barbar de Europa. La gidores roman-brites ia fronti un problem cresente de securia par causa de atacas de la mar, spesial la pictos a la costa este de England. La solve de la gidores roman-brites ia es demanda per aida de la mersenarios anglosason (conoseda como foederati), a ci los ia sede teritorio. En 442 la anglosasones ia rebela, parente car on no ia paia los. La romanes-briteses ia responde par apela a la comandor roman de la Impero ueste, Aetio (un documento conoseda como la Jemi de la brites), an si Honorio, la imperor de la Impero Roman Ueste, ia scrive a la civitas brites en 410 ce los debe xerca sua propre modo de defende. A pos, alga anios de luta entre la brites e la anglosasones ia segue. La luta ia continua asta la anio 500, cuando, en la batalia de la Monte Badaon, la brites ia vinse la anglosasones.

Migra e forma de renas (400-600)[edita | edita la fonte]

Model de la migras entre la sentenios 2 e 5.

Arcivos esiste de infiltra germanica en Britan de ante la colasa de la Impero Roman. On crede ce la visitores germanica prima ia es oto grupos de batavianes unida a la Armada 14 en la fortia de invade orijinal su Aulo Plautio en 43. On ia ipotese ce alga de la tribus nativa, identifiada como briteses par la romanes, ia parla un lingua germanica, ma la plu de la eruditas moderna desacorda con esta.

Lo ia es multe comun ce Roma ia infla sua armadas con foederati enscriveda de la teras germanica. Esta pratica ia estende ance a la armada servinte en Britan, e on pote identifia tombas de esta mersenarios, liada a sua familias, en la semeteros roman de la periodo. La migra ia continua con la parti de la armada roman, cuando la anglosasones ia es enscriveda per defende Britan, e ance en la periodo de la rebela anglosason prima de 442.

Si on crede la Arcivo Anglosason, la renas anglosason diversa cual ia fusa final per deveni England ia es fundida cuando marinetas peti de tre o sinco barcos de invadores ia ariva a locas diversa a la costa de England per luta contra la briteses posroman e ia concista sua teras. Como diseda par Margaret Gelling, en la contesto de atestas en la nomes de locas, lo cual ia aveni entre la parti de la romanes e la ariva de la normandes es un tema de desacorda entre la istoristes.

Mapa de la colonias briton en la sentenio 6[1].

On pote vide la ariva de la anglosasones a Britan en la contesto de un move jeneral de la poplas germanica sirca Europa entre la anios 300 e 700, conoseda como la Periodo de Migras o Völkerwanderung. En la mesma periodo on ia ave la migras de briteses a la penisola Armorica (Bres e Normandia en Frans moderna): sirca 393 en la governa roman, ma ance sirca 460 e en la desenios de 550 e 560; on crede ce la migra de la desenio de 460 es un reata a la luta en la rebela anglosason entre 450 e 500, como ance la migra a Britonia (oji Galisia, en Espania) en la mesma tempo.

La istoriste Peter Hunter-Blair ia esplica lo cual oji es la opina tradisional sur la ariva anglosason a Britan. El ia proposa un migra coletiva, cual ia afeta la brites posroman e ia esclui los a la ueste de la isolas, e a la penisolas Bres e Iberian. Esta opina ia es probable influeda par fontes como Beda, do on dise ce la briteses ia es masacrada o ia vade a "sclavia eterna". Seguente Härke la opina la plu moderna es de coesiste entre la briteses e la anglosasones. El sujesta ce arceolojistes moderna diversa ia reevalua la model de invade e ia developa un model de coesiste fundida sur la Leges de Ine. Esta leges inclui proposas diversa cual furni ses niveles de uergeld per la briteses, de cual cuatro es su lo de la omes libre. An si lo es posible ce la Brites ia es omes rica, en la sosia anglosason, lo pare ce los ia ave un prestijia plu basa ca la anglosasones.

Discutes e analises continua ancora sur la cuantia de migrores, e esce los ia es un grupo peti de anglosasones elejeda ci ia vade e ia prende e governa la pais, o un migra coletiva cual ia inonda la britones.

Seguente Gildas, un resiste enerjiosa inisial brites ia es gidada par Ambrosio Aureliano, e de esta tempo la vinse ia flutua entre ambos nasiones. Gildas ia rejistra un vinse "final" de la Britones en la batalia de Monte Badon sirca 500, e esta sinia la punto cuando la migra anglosason ia es tempora dejetada. Gildas ia dise ce esta batalia ia aveni a "44 anios e un mense" pos la ariva de la sasones, e ia es la anio de sua nase. El ia dise ce un tempo de ricia grande ia segue. Ma, an con la calmia, la anglosasones ia prende Sussex, Kent, Anglias Este e un parte de Yorkshire, en cuando la sasones ueste ia fundi un rena en Hampshire su la gida de Cerdic, sirca 520. Par contrasta, a 50 anios a pos, la anglosasones ia comensa plu avansas. En la anios de interveni, la britones ia fatiga se con gera sivil, disputas interna e turbas jeneral: esta ia inspira Gildas a scrive De Excidio Britanniae (Sur la ruina de Britan).

La campania major seguente contra la britones ia es en 577, gidada par Cealin, re de Wessex, de ci sua campanias ia susede prende Cirencester, Gloucester e Bath (conoseda como la batalia de Dyrham). Esta crese de Wessex ia fini subita cuando la anglosasones ia comensa luta entre se e ia causa ce Cealin ia retira a sua teritorio orijinal. El ia es recambiada par Ceol (posible sua sobrino): Cealin ia es matada en la anio seguente, ma la arcivos anial no spesifa par ci. A pos, Cirencester ia deveni un rena anglosason su la xefia suprema de la popla de Mercia, en loca de Wessex.

Referes[edita | edita la fonte]

  1. Morris, 1973

Bbiliografia[edita | edita la fonte]