Egiptian (lingua)

De Vicipedia
Jump to navigation Jump to search
La papiro de Ebers (1550 aec) conteni prescrives scriveda en ieroglificas per plu ca 700 remedias; esta es per un remedia per asma, cual es preparada como un misca de erbas caldida sur un brice per ce la sufror pote enspira la fumas

La lingua egiptian ia es parlada en Egipte antica e ia es un ramo de la linguas afroasiatica. Lo es atestada tra un tempo multe longa, de la paso de egiptian vea (la media de la milenio tre, Rena Vea). La frase scriveda la plu vea ce ia es conoseda ia es datida a sirca 2690 aec, cual mostra ce lo es un de la linguas conoseda la plu vea, con sumer.

La forma clasica es nomida egiptian media, la lingua de la Rena Media cual ia resta la lingua leteratural de Egipte asta la periodo roman. La lingua parlada ia evoluida a demotica per la eda de anticia clasica e final a copta par la eda de cristiani. Copta parlada ia es cuasi estinguida par la sentenio 17, ma resta en usa como la lingua liturjial de la Eglesa Copta Ortodox de Alexandria.

La lingua egiptian parteni a la familia de linguas afroasiatica. Entre la cualias tipolojial de egiptian cual es tipal afroasiatica es sua morfolojial fusada e nonseguental, un serie de consonantes forte, un sistem de tre vocales (a, i, u), la sufisa fema de nomes -at, nominal m-, ajetival -i, e la afisas persona per verbos tipal. De la otra ramos afroasiatic, linguistes ia sujeste ce la lingua egiptian comparti la plu similes con berber e semitica.

La lingua egiptian ave multe radises biradical e posible monoradical, contrastante con la prefere semitica per radises triradical. Egiptian es probable plu conservante, e semitica probable vade plu tarde tra regula cual converti radises a la model triradical.

Gramatica[edita | edita la fonte]

Egiptian es cuasi tipal per un lingua afroasiatica en cual a la cor de sua vocabula es plu comun un radis de tre consonantes, ma a veses on ave sola du consonantes en la radis (pe rꜥ(w) [riːʕa], "sol"). Radises plu grande es ance comun e pote ave asta sinco consonantes (pe sḫdḫd, "es inversada").

Vocales e otra consonantes es ajuntada a la radi per deriva sinifias diferente, como arabi, ivri, e otra lingua afroasiatica fa ancora. Ma, car vocales e a veses la semivocales no es scriveda en cualce scrive egiptian esta copta, lo es difisil per reconstrui la formas vera de parolas. Donce, stp ("eleje"), per esemplo, pote represente la stante (de cual sua finis pote resta nonespresada), la formas nonperfetiva o an un nom verbal ("un eleje").

Nomes[edita | edita la fonte]

Nomes egiptian pote es mas o fema (cual es indicada, como en otra linguas afroasiatica, par ajunta -t) e singular o plural (-w / -wt) o dual (-wy / -ty). Egiptian plu tarde ia tende perde la dual como un forma produinte.

Articles (de defini e nondefini) no aveni ante egiptian tarde, ma es vasta usada pos alora. La formas plu tarde de egiptian usa pꜣ, tꜣ, e nꜣ.

Pronomes[edita | edita la fonte]

Egiptian ave tre tipos diferente de pronomes personal: sufisa, proclitica (nomida "dependente" par egiptolojistes) e autonom. On ave ance un cuantia de finis verbal ajuntada a la infinitiva per forma la stante e es regardada par alga linguistes como un colie "cuatro" de pronomes personal.

Sufisa Dependente Autonom
person 1 singular -ı͗ wı͗ ı͗nk
person 2 singular mas -k tw ntk
person 2 singular fema -t tn ntt
person 3 singular mas -f sw ntf
person 3 singular fema -s sy nts
person 1 plural -n n ı͗nn
person 2 plural -tn tn nttn
person 3 plural -sn sn ntsn

Verbos[edita | edita la fonte]

Verbos egiptian ave formas finita e nonfinita. Verbos finita mostra person, tempo/aspeta, modo, e vos. Cada es indicada par un colie de morfemes juntada a la verbo. On ave du tempos/aspetas major en egiptian: pasada e nonperfeta/aoriste. La nonperfeta/aoriste es determinada par la contesto sintatica.

Verbos nonfinita aveni sin un sujeto e inclui la infinitiva, la partisipios, e la infinitiva negativa.

Ajectivos[edita | edita la fonte]

Ajetivos acorda en seso e cuantia con la nomes ce los altera: per esemplo, s nfr ("(la) bon om") e st nfrt ("(la) bon fem").

Ajetivos atribuinte en proposas es poneda pos la nomes ce los altera: nṯr ꜥꜣ ("(la) dio grande"). Ma, cuando los es usada autonom como un predica en un proposa ajetivin, ajetivos presede la nomes ce los altera: pe, ꜥꜣ nṯr ("grande (es la) dio").

Preposadas[edita | edita la fonte]

Egiptian usa preposada cual, como en multe linguas indoeuropean, incluinte elefen, vade sempre ante la nom, nunca pos.

Averbos[edita | edita la fonte]

Averbos, en egitpian, es a la fini de un frase. Per esemplo, zı͗.n nṯr ı͗m ("(la) dio vade ala"), im ("ala") es la averbo.

Frases[edita | edita la fonte]

Egiptian vea, clasica, e media ave la ordina de parolas verbo-sujeto-ojeto, como la linguas semitica. Ma lo ia cambia en la formas plu tarde, incluinte egiptian tarde, demotica, e copta. "La om abri la porte" ta es espresada, en la formas plu temprana, "abri (la) om (la) porte" (wn s ꜥꜣ). La jenitiva es formida par junta du o plu nomes, como en la linguas semitica e berber.