E-Prime

De Vicipedia
Jump to navigation Jump to search

E-Prime (lo sinifia English Prime) es un modo de parla engles sin usa la verbo "es", en engles to be, en alga modo (be, is, am, are, was, were, been, being [1]). En loca, un parlor o un scrivor de E-Prime usa verbos diferente como "deveni" (en engles to become), "permane/resta" (to remain), e "egala" (to equal) o los pote organiza la frase par mostra cual o ci fa la ata. Per esemplo, en E-Prime, un scrivor ta cambia la declara Mistakes were made = "Eras ia es fada" a Joe made mistakes = "Joe ia fa eras". Esta cambia en parla revela un ator (Joe) en cuando la forma presedente ia nega la ator. La usores de E-Prime ta considera ce la frase cambiada es plu sufisinte.

Razonas de E-Prime[edita | edita la fonte]

D. David Bourland, Jr. prima ia proposa E-Prime en 1965. Bourland ia studia Semantica Jeneral en la pasada. La idea xef de la Semantica Jeneral es ce umanas pote sola sabe cual los oserva e esperia cuando los vide, oia, toca, senti par sabor, odori, pensa, e senti, e en plu, la oservas e la esperias pote influe la oservas e la esperias futur. Car cadun ave esperias diferente de la otras, la comprendes de la esperias es ance diferente.

Studiantes de Semantica Jeneral e usores de E-Prime sujeste ce un espresa como This cat is soft ("Esta gato es suave") omete otra atribuidas, e implica ce la "ojeto" esterna de la gato es la "mesma como" la esperia interna de "es suave". En loca, usores de E-Prime dise This cat feels soft TO ME("Esta gato pare suave A ME") per recolie de la seguintes:

  1. Ce sua esperia de "es suave" envolve e la "ojeto" esterna nomida "gato" e la oios, manos, serebro e sistem de nervos de la oservor.
  2. Ce un otra person ta pote esperia aspetas diferente de la gato.
  3. Ce un person ta pote esperia un cosa diferente en un tempo diferente o en situas diferente (per esemplo, la gato pote raspa los, o pare umida, o es covreda con tera.)

E-Prime e Semantica Jeneral no es linguas o formas de engles diferente. En loca, los furni modos diferente de pensa e de parla de la mundo.

Linguas como arabi, turces, e cantones, an si los no ave un verbo unica per "es", ave la idea de "es". Per esemplo, un parlor de elefen pote dise "Esta poma es roja". Un parlor de arabi ta pote dise "Esta poma roja". La majoria de linguas pote es usada per vosi la idea de un roja poma. Un usor de E-Prime pote sola dise ce "Esta poma pare roja a me" per recorda ce "vide de roja" envolve e la poma e la oio e serebro, etc, de la person regardante la poma.

Multe enseniores de engles coraji de studiantes usa verbos otra ca "es". Per los, la usa de verbos plu ativa fa un obra scriveda plu clar e plu interesante. Esta enseniores vole refina obras scriveda par sua studiantes, e no vole nesesada promove la ideas de Semantica Jeneral o E-Prime.

Notas[edita | edita la fonte]

  1. En lfn on ave "es", "ia es", "va es", "esente")