Umana

De Vicipedia

Umanas moderna (Homo sapiens, suspesie xef: Homo sapiens sapiens) es la sola membros esistente de la sutribu Hominina, cual es un ramo de la tribu Hominini (ominines), cual es relatada a la familia de primates grande. Los es marcada par posa erijeda e move bipede; destrosia alta de manos e usa grande de utiles cuando on compara esta a otra animales; e un tende jeneral a serebros e sosias plu grande e complicada.

Ominines primitiva – spesial la australopithecos, de ci sua serebros e anatomia ia es plu simil a primates nonumana en multe modos – es min comun regardada como "umana" ca la ominines de la jenero Homo. Alga de esta ominines ia usa foco, ia ocupa multe de Eurasia, e ia es la orijina de Homo sapiens anatomial moderna a sirca 200 000 anios en la pasada. Los ia comensa mostra indicas de condui moderna a sirca 50 000 anios en la pasada. En alga ondas de migra, umanas anatomial moderna ia veni de Africa e ia popla la plu de la mundo.

La estende de umanas e sua popla grande e cresente ia ave un efeto profonda sur areas grande de la ambiente e miliones de spesies nativa tra la mundo. Vantajes cual umanas ave cual esplica esta susede evolual inclui un serebro relativa plu grande con un neocortex, un cortex prefrontal e lobes tempal spesial bon developada, cual capasi niveles alta de razona astrata, lingua, solve de problemes, sosialia e cultur par aprende sosial. Umanas usa utiles multe plu ca otra animales, e es la sola spesie esistente cual construi focos e coce sua comeda. Los es ance la sola spesie cual vesti se, e crea e usa multe otra tecnolojia e artes.