Cuoca

De Vicipedia
Jump to navigation Jump to search
Un cuoca a Isola Rottnest, Australia Ueste
Mapa de la distribui de la cuocas
Un familia de cuocas
Un cuoca a la Hotel Rottnest

La cuoca, acc como la ualabi de boscas con codo corta (Setonix brachyurus), la sola membro de la jenera Setonix, es un macropodo peti sirca la grandia de un gato de casa. Como otra marsupiales en la familia macropodo (como cangarus e ualabis), la cuoca es erbivor e xef noturna.

Cuocas es trovada sur alga isolas peti a via de la costa de Australia Ueste, spesial Isola Rottnest, prosima de Perth, e ance Isola Bald prosima a Albany, e en grupos isolida e sperdeda en forestas e stepe costal entre Perth e Albany. Un colonia peti esiste a la limita este de sua estende en un area protejeda de Two Peoples Bay Nature Reserve, do los coesiste con la potoru de Gilbert, cual es menasada estrema con estingui.

Un cuoca pesa 2.5 a 5.0 kg e ave un longia de 40 a 54 cm, con un coco 25 a 30 cm. Lo ave un corpo spesa, gamas bon developada, oreas ronda, e un testo corta e larga. Sua sistem de musculos ia es orijinal adatada per salta bipede, ma tra sua evolui, la sistem ia ajusta per move tra arbores. An si lo pare como un cangaru peti, lo pote asende arbores e arboretas asta 1.5 metres. Su pelo ru es un brun grisin cual pali a beje a la adomen. La cuoca pote vive per sirca 10 anios.

Cuocas ave un modo de reprodui promiscua. Femas es matur sesal a sirca 18 menses. Pos un mense de jesta, los pari un bebe nomida un joey, cual abita sua pox per ses menses. La joey depende de sua madre per du plu menses pos sorti la pox, e es completa destetida sirca oto menses pos nase. Femas pote pari du veses per anios.

Un marinor nederlandes Samuel Volckertzoon ia scrive de un "gato savaje" a Isola Rottness en 1658. En 1696, Willem de Vlamingh ia malpersepi los per ratas jigante e nomida la isola per "nido de ratas", o Rattnest. La nom cuoca es de la parola gwaga en la lingua nyungar.

Como la plu de macropodos, cuocas come multe tipos de plantas, incluinte erbas, siperos, e folias. Un studia ia trova ce Guichenotia ledifolia, un arboreta peti de la familia Malvaceae, es un comeda favoreda de la cuocas. La plantas spinosa Acanthocarpus, cual es difisil per umanas e otra animales plu grande per pasea, dona la refuja favoreda par la cuocas per dormi en la dia.