Cultur de vasos perforada
La cultur de vasos perforada (sirca 3500 - 2300 aec) ia es un cultur de xasores-coliores en Scandinavia sude, xef longo la costas de Svealand, Gotaland, Aland, Danmarc norde-este, e Noria sude. An si lo ave un economia mesolitica, lo es tradisional clasida como neolitica, car lo ia aveni en la periodo en cual cultiva ia ateni Scandinavia. La popla de la cultur de vasos perforada ia es xef xasores maral e ia partisipa en comersia vivente con la comunias cultivante de la interna de Scandinavia e otra xasores-coliores de la Mar Baltica.
La popla de la cultur de vasos perforada ia es jenetical omojen e distinguable, desendeda de xasores-coliores plu temprana de Scandinavia. La cultur ia emerji en Sveria este-sentral sirca 3500 aec e ia recambia la cultur de vasos embutin tra a areas costal de Scandinavia sude. A pos, lo co-esiste con la cultur de vasos embutin per alga sentenios.
De sirca 2800 aec, la cultur de vasos perforada ia co-esiste con la cultur de axas de gera (cultur de vasos cordida), cual ia es lo cual segue la cultur de vasos embutin en Scandinavia sude. Per 2300 aec, la cultur de vasos perforada ia es asorbeda en la cultur de axa de gera. La eda de bronze nordica cual segue representa un fusa de elementos de la cultur de vasos perforada e la cultur de axa de gera. Scandinavianes moderna, no como la sami, ave orijinas jenetical partal de la popla de la cultur de vasos perforada.