Cultur Bug-Dnistr

La cultur de Bug-Dnistr ia es un cultur arceolojial cual ia developa en la rejion de txernozem* de Moldavia e Ucraina sirca la rio Dnistr e rio Bug sude en la neolitica.

Tra sirca 1000 anios (6300-5500 aec), la cultur de Bug-Dnistr ia traversa tra fases diferente de cultur, ma la popla resta la mesma. Cual es la plu notable sur la neolitica de esta rejion es ce lo ia developa autonom de la mesolitica ala, tra contata con la cultures calcolitica en la ueste e la cultures de xasores-coliores neolitica en la este (pd neolitica per sua seramicas, no per sua cultiva). La popla de esta rejion dependente xef sur la xasa de uros, servos roja, caprioles, e porcos savaje, e la pesca de rutilos, angilas, e lusios. Los ia fabrica seramica de sirca 6200 aec. Esta tipo de seramica ia ariva en la area de la rio Volga de la rejion de lago Baical en Asia. Un cualia notable es ce multe vasos ia ave fondos puntida, desiniada per coce sur un foco. Los ia es a veses decorada en motifes de linias ondosa.

Esta cultur local ia es influeda par la cultur Koros-Cris neolitica, un visina de cual sua orijina ia es en la basin Carpatian. La cultivores de Koros-Cris ia ariva en la vales alta de la rio Seret e la rio Prut sirca 5800-5700 aec. Vasos de Koros-Cris ia es copiada par la popla de la Bug-Dnistr. Erbas savaje ia es abandonada e la cultivores ia prefere trigo monococo, dicoco, e spelta. La eleva de boves ia es ance adotada. Alga de la indicas prima per plantas e animales domada en la neolitica ia es trovada en la stepe ueste ia es la osos de porcos e boves, e la orzo e dicoco a locas de Bug-Dnistr.

• Txernozem es un solo negra fertil, rica en umus, con un strato rica en calce a su. Tal solos tipal aveni en savanas temperada como la stepes rusce e la prados de America Norde.