Cuerco

De Vicipedia
Jump to navigation Jump to search
La folias e cuercas de un cuerco
La cuerco Tamme-Lauri es la arbor la plu vea e la plu spesa en Esti

Un cuerco es un arbor o arboreta en la jenero Quercus, de la familia de la faia, Fagaceae. On ave sirca 600 spesies esistente. La jenero es nativa a la emisfero norde, e inclui spesies caduca e sempreverde. America norde ave la plu spesies, con sirca 90 en la SUA e 160 en Mexico. La area du en diversia es Xina, con sirca 100 spesies.

Cuercos ave folias ordinada spiral, con bordas lobo en multe spesies. Algas ave folias sierin o folias con bordas lisa. Multe de la spesies caduca no cade sua folias mor asta primavera. En primavera, un sola arbor produi e flores mas (en la forma de amentos) e flores fema multe peti. La fruta es un noze nomida la cuerca, cual es liada a la tronceta par un strutur copin nomida un "cupola". Cada cuerca conteni un seme (o rara, du o tre) e nesesa 6 a 18 menses per matur, dependente de la spesies. La cuercas e folias conteni asida tanica, cual aida garda de fungos e insetos. La cuercos "vivosa" es distinguida par sua sempreverdia, ma no es vera un grupo distinguida, ma es sperdeda tra la jenera.

La lenio de la cuerco ave un densia de sirca .75 g/cm3 cual crea fortia e duria grande. La lenio es multe resistante a ataca par insetos e fungos per sua tanica. Lo ave marcas de pelo atraosa, e es usada multe per solos, cabinetas, mobiles, e xapa. Plances de cuerco ia es comun en la barcones longa de la vicinges en la sentenios 9 e 10, e en la eda medieval per usa en la paneles de construidas prestijiosa, como la salon de debata de la Casa de Comunes en London. Cuerco ia es usada en Europa per construi la barcones de gera asta la sentenio 19, e per construi strutures de lenio.

La cuerco ia es importante en mitos e relijios antica. En Elas, la cuerco ia es santa a Zeus, e pretes ta interpreta la xuxas de la folias per mesajes de el. En la mitolojia baltica e slavica, la cuerco es la arbor anda de Percunas, la dio de tona. Simil, en la mitolojia norsce, la arbor es santa a la dio de tona Tor. En la politeisme de la celtas, la nom de la cuerco ia es un parte de la parola protocelta per druida: *derwo-weyd, "cuerco-saja". La mesma parola ia es ance usada per "forte" e "firma". La indoeuropeanes jeneral ia adora la cuerco e liada lo con sua dios de tona. Un studia ia demostra (suposada) an ce cuercos atrae plu lampo ca otra arbores de sua altia.