Cortex serebral

De Vicipedia
Jump to navigation Jump to search
Un talia de la serebro de un macaca adulte
Neurones tinjeda en la metodo de Golgi
Lobes de la serebro en lfn

La cortex serebral es la area la plu grande de la serebro, e jua la rol xef en memoria, atende, persepi, cognisio, consensia, pensa, lingua, e personalia. Lo es la parte de la serebro la plu anterior e es composada de un zona esterna de texeda neuronal nomida la materia gris, cual conteni la corpos selulal de neurones. Lo es ance divideda entre du emisferas - destra e sinistra - par la fesur lonjitudal, ma la du emisferas es juntada a la media par la corpo colasal.

A la nivel selulal e sircuital, la cortex serebral es marcada par du cualias xef de organiza:

1. longo sua surfas, lo es divideda entre areas funsional cual organiza la enflue e esflue de funsiones de sensas, moves, e cognisio, e
2. lo es sudivideda entre stratos cual organiza la comuta enfluente e esfluente de la neurones local.

Esta du proprias furni la funsiona modulal.

En mamales grande, la cortex serebral es tipal pliada, furninte un area de surfas plu grande en la volum restrinjeda de la cranio. Un area grande es crededa como importante car lo permete la ajunta e evolui de un diversia plu grande de modulos funsional. Un plia o cresta en la cortex es nomida un jiro, e la ranur es nomida un sulco (plia). Estas apare entre la developa fetal e continua matura pos nase tra la prosede nomida jiri. En la serebro umana, la majoria de la cortex serebral no es vidable de la esterna, ma es ascondeda en la sulcos.

La cortex serebral conteni un cuantia grande de corpos selulal neuronal e glial (aidante), plu sua formas complicada de dendrites e estendes de asones, cual junta a sinapses per crea sircuitos funsional. La cortex es composada intera de materia gris, e contrasta con la materia blanca a su, cual es composada xef de asones viajante a e de la cortex, con sua gainas de mielin e la corpos selulal de oligodendrosites.

Tradisional, la cortex es ance divideda entre cuatro lobes a cada lado: La frontal, la tempal, la parietal, e la osipital, divideda par sulcos profunda clar.