Calsio

De Vicipedia
Jump to navigation Jump to search
Cristales de calsio
Calsito, un forma de carbonide de calsio

Calsio es un elemento cimical con la simbol Ca en la table de elementos, e la numero atomal de 20, indicante ce lo ave 20 protones. Calsio ave un masa de sirca 40.08. La du isotopos la plu comun es Ca-40 e Ca-44. Calsio es un metal mol e gris pal, un solida e opaca. de la grupo de elementos nomida metales de tera alcalin. Lo fonde a un temperatur plu calda ca la plu de otra metales reatante, e alga plu dur ca plomo. Lo no condui eletrica tan bon ca cupre, ma es multe plu lejera.

Calsio reata con acua per produi idrojen e idrosido de calsio. Lo reata rapida cuando un polvo, ma cuando lo es un peso solida, lo reata lente car la idrosido de calsio formi un strato covrente cual no disolve. Si alga asida es ajuntada a la idrosido de calsio, lo disolve. Calsio arde cuando polvida e crea un flama rojin. En esta modo, lo deveni osido de calsio. Cuando caldida, lo deveni nitrido de calsio. E lo pote reata con alojenes per deveni alidos como clorido de calsio.

Calsio no es trovada como un metal en la tera, car lo es tro reatante. Lo es plu comun como carbonato de calsio, ance conoseda como calsito. Lo es trovada en calcario como calce, e en perlas, concas, e la cascos de ovos.

Calsio en viventes[edita | edita la fonte]

Multe selulas ave canales per calsio a sua surfas. Estas es abridas do la iones de calsio pote entra la selula. Pos entra la selula, la iones de calsio ativi multe protenas nesesada. Per esemplo, cuando calsio entra selulas de musculos, lo causa los per contrata. Cuando lo entra selulas de nervos, lo stimula impulsas eletrical. Cuando lo entra selulas blanca de sangue, lo ativi los per combate microbios.

Calsio es importante car selulas nesesa iones de calsio sufisinte per opera. Ma tro multe calsio pote es ance perilosa. Si un selula reseta plu iones de calsio ca lo nesesa, lo pote mori; donce, la cuantia de iones de calsio en selulas es multe regulada. La corpo controla la metaboli de calsio par regula cuanto calsio on reseta de comedas, cuanto on perde en urina, e cuanto es usada per manteni osos.

La plu de calsio es reservada en la osos. Si la corpo nesesa plu calsio per sangue, musculos, o otra texedas, lo prende lo de la osos. Ma si on no reseta calsio sufisinte, on pote developa osteoporose, un debili de la osos cual pote resulta en sua rompe.

La corpo controla la niveles de calsio con ormones. Calsitonin, la ormon de la paratiroide, e vitamina D es la tre ormones la plu importante en la metaboli de calsio. Nota ce vitamina D, an si nomida un vitamina, opera como un ormon.

A veses, selulas debil nesesa mori per la corpo pote repone los con selulas nova. Selulas ave instruis en sua ADN cual indica cuando los debe mori e pote stimula reatas per fini sua sicles de vive en multe modos. Cuando esta aveni, lo es nomida apoptose o "mori programida". Un modo en cual selulas causa apoptose es par aseta cuantias venenosa de iones de calsio.

Prepara e usas[edita | edita la fonte]

Calsio pote es fabricada par usa eletrolise de clorido de calsio fondeda. Como un elemento, calsio es usada en la redui de otra metales, o pote es ance usada per crea alias con otra metales.

Composadas de calsio es ance importante en cimica. Per esemplo, lo es un parte de semento. Osido de calsio es usada per fabrica paper, seramica, alga comedas, e per puri acua. Carbonato de calsio es usada como un aumenta per persones ci nesesa plu. E permanganato de calsio pote es usada como un propulsante per rocetas.