Baba Iaga

De Vicipedia
Jump to navigation Jump to search
Baba Iaga, en sua bol e portante sua piston
Vasilisa, con la cabana con gamas de gal en la fondo

En folclor slavica, Baba Iaga (balgarsce: Баба Яга, rusce: Ба́ба-Яга́) es un fem supranatural (o tre sores con la mesma nom) ci apare como un fem vea malformida o ferosa. En la folclor rusce, Baba Iaga vola en un bol, porta un piston, e abita en la foresta en un cabana descriveda como stante sur gamas de un gal.

Baba Iaga pote aida o impedi los ce encontra el o xerca per el. El pote ave un rol madrin e ave asosias con la animales de la foresta. En alga naras, el es un monstro ci come enfantes, e en otras el aida un prinse per trova sua prometeda perdeda.

En rusce vea, "baba" pote sinifia un comadre, un sorsor, o un clarvidor; la sinifia xef es aora un ava o fem vea. La nom "Iaga" es posible derivada de "jeza" o simil, cual sinifia sorsor o mal fem en alga linguas slavica.

Jezibaba, un figur simil a Baba Iaga, aveni en la folclor de popla de slavica ueste. La du carateres desende posible de un carater comun tan distante como la periodo medieval o an plu temprana, e es ambos simil ambigua. Baba Iaga ia apare en sentos o an miles de naras de folclor en Rusia, Ucraina, e Bielarus ante la sentenio 18.

Un carater asosiada con Baba Iaga es Vasilisa la Bela, ci sembla Senerela. El ave un estramadre ci ia es multe cruel a el, e du estrasores ance cruel. Los dirije el per oteni foco de Baba Iaga. Ma Baba Iaga gusta la aida ce Vasilisa ofre, e recompensa el par mata sua estrafamiia. Vasilia, ultima, es sposida con la tsar.

En la naras, Baba Iaga mostra un varia de cualias tipal: sua cabana con gamas de gal, cual pote jira; la bol e piston, o scopa. Baba Iaga pote ole la odor de un rusce de visitores, cual el proclama en un tono menasante. En multe naras, on ave tre Baba Iagas, imajinada como sores.