Senerela

De Vicipedia

Senerela (engles: Cinderella, franses: Cendrillon, espaniol: Cenicienta, italian: Cenerentola, deutx: Aschenputtel, nederlandes: Assepoester, rusce: Золушка) es un fable antica e poplal.

La nara fundal es de un fem joven ci vive en un situa de miseria: sua madre es mor, e sua padre ia resposi a un fem basa. Esta fem fa ce Senerela servi la familia como un sclavo. A un dia, Senerela es visitada par sua madrin en la forma de un fe. La madrin, par majia, dona a Senerela un roba bela e otra cosas afin el pote vade a un dansa a la castel. La madrin dise a Senerela ce el nesesa parti de la castel ante medianote, o el va deveni denova un fem povre. La prinse de la pais dansa con Senerela e comensa ama el. Ma, a medianote, Senerela core de la castel. Sola sua sapato peti resta a la castel! La prinse, volente trova Senerela, comanda sua servores a fa ce tota femes joven de la rena atenta porta la sapato peti. Natural, sola Senerela ave pedes tan peti! Los sposi, e vive sempre felis.

Multe varias es creada tra la edas, incluinte filmas moderna. Un esemplo es la filma Pretty Woman ("fem bela"), en cual la eroe es un prostituida ci deveni amada par un om rica. Orijinal, la nara de Senerela ia ensenia a fias ce, si los es bon e grasiosa, los va es recompensada par ama. Oji, la nara es videda como un nara de espera falsa de fias ci pensa ce sua problemes va es solveda par un om spesial. La fem moderna no debe depende de un "prinse", ma nesesa fa sua propre vive.